काठमाडौँ, असोज १८ गते । राष्ट्रिय स्वतन्त्र पार्टी (रास्वपा) का सभापति रवि लामिछानेले सरकार ढल्ने चर्चा निराधार भएको बताउँदै मुलुकको परिवर्तनका लागि सबै राजनीतिक दललाई एकजुट भएर अघि बढ्न आह्वान गर्नुभएको छ।
नेपाली कांग्रेसको १५औँ महाधिवेशनको उद्घाटन समारोहमा आइतबार सहभागी हुनुभएका लामिछानेले सरकार बलियो रहेको दाबी गर्दै सरकार ढल्ने हल्ला फैलाउनेहरू नै राजनीतिक रूपमा कमजोर हुने टिप्पणी गर्नुभयो।
“सरकार अहिले ढल्छ, दसैँमा ढल्छ, तिहार र छठपछि ढल्छ भन्ने हल्ला बाहिर छ, त्यो सम्भव छैन। सरकार बलियो छ, सरकार ढल्छ भन्नेहरू नै ढल्नेछन्,” उहाँले भन्नुभयो।
कांग्रेसको महाधिवेशनमा सत्तारूढ दलका सभापतिका रूपमा सम्बोधन गर्दै लामिछानेले सरकारको कार्यशैली र नियत सही रहेको उल्लेख गर्नुभयो। उहाँले रास्वपा परिवर्तनको मुद्दामा नेतृत्व गरिरहेको दाबी गर्दै देश निर्माणको अभियानमा सबै राजनीतिक शक्तिलाई सहकार्यका लागि आग्रह गर्नुभयो।
उहाँले रास्वपा दलीय सहकार्यका लागि सधैँ तयार रहेको स्पष्ट पार्दै लोकतान्त्रिक व्यवस्था र अर्थतन्त्रलाई कमजोर हुन नदिने प्रतिबद्धता व्यक्त गर्नुभयो। जनताको मतबाट ठूलो दल बनेको रास्वपाले परिवर्तनको एजेन्डालाई गम्भीरतापूर्वक अघि बढाइरहेको उहाँको भनाइ थियो।
“जनताको मन जित्ने गरी काम गर्दैछौँ। लोकतन्त्रको हुर्मत लिने काम गर्नेछैनौँ। तपाईँहरूले कसैले पनि त्यो काम नगर्नुहोला,” उहाँले भन्नुभयो।
कांग्रेसको महाधिवेशनमा सहभागी हुन पाएकोमा खुसी व्यक्त गर्दै लामिछानेले आफ्नो दललाई निमन्त्रणा गरेकोमा कांग्रेस सभापति गगनकुमार थापाप्रति आभार व्यक्त गर्नुभयो।
कांग्रेसको १५औँ महाधिवेशनको उद्घाटन समारोहमा विभिन्न राजनीतिक दलका शीर्ष नेताहरू सहभागी भएका थिए।