काठमाडौँ, भदौ ३० । पार्टी एकतालाई सृदृढ तरिकाले सम्पन्न गराएर छाड्ने प्रधानमन्त्री केपी शर्मा ओलीले बताएका छन् ।
आज पोष्टबहादुर बोगटी स्मृति प्रतिष्ठानद्वारा पार्टी मुख्यालय धुम्बाराहीमा बोगटीको चौथौ स्मृति दिवसका अवसरमा आयोजित कार्यक्रममा बोल्दै उनले अहिले पार्टीमा अन्तरविरोध खडा गर्ने, भाँजो हाल्ने काम भइरहेको भन्दै त्यसको अन्त्य गर्दै पार्टी एकतालाई सुदृढ गराएर छाड्ने जनाएका छन् ।
उनले बोगटीजस्ता महान् योद्धाको सपना साकार पार्न पनि पार्टी एकतालाई निष्कर्षमा पुर्याउनुपर्ने आवश्यकता औल्याएका छन् ।
सानातिना कुरा, आफ्ना हित र अहंकारमा अल्झियो भने शहीदको सपना पूरा गर्न नसकिने उनको भनाइ छ । शहीदका सपना पूरा गर्न पनि पार्टी एकतालाई सुदृढीकरण गर्दै मुलुकलाई समृद्धितर्फ लैजानु पर्दछ उनले भने।
प्रधानमन्त्री ओलीले पार्टी एकतालाई भत्काउनका लागि घुसपैठ गर्ने, अन्तरविरोध चर्काउने र दुई अध्यक्षबीच भाँजो हाल्ने प्रयास भइरहेकाले यसबाट सचेत हुनुपर्नेसमेत बताएका छन् ।
उनले भने देशभित्र र बाहिर कतिपय शक्ति हामीबीच अन्तरविरोध चर्काउन खोजिरहेका छन् , हामी त्यस्ता अन्तरविरोधलाई चिर्दै प्रतिक्रियावादीका हमलालाई जवाफ दिँदै पार्टी एकतालाई टुङ्गोमा पुर्याउछौँ ।
कम्युनिष्ट आन्दोलनलाई मदन भण्डारीदेखि पोष्टबहादुर बोगटीका मार्गमा हिँडाएर जनताका आकांक्षा पूरा गर्नुपर्नेमा उनको जोड छ । जुन किसिमको समाजवाद स्थापना गर्ने उहाँहरुले सपना देख्नुभएको थियो । त्यो सपना हामी पूरा गर्ने छौँ” प्रधानमन्त्रीले भने।
सुखी नेपाली र समृद्ध नेपाल सबैको चाहना भएकाले त्यसलाई पूरा गर्न कम्युनिष्ट आन्दोलन एक भएर लागेको जनाउँदै उनले अब यो एकता कहिल्यै विभाजित नहुने पनि प्रष्ट पारे ।
उनले लोकतन्त्रलाई सुदृढ पार्दै देशमा ब्याप्त भ्रष्टाचारलाई जरैदेखि उखलेर फाल्ने अभियानमा सरकार लागिपरेको समेत जनाए ।
उक्त कार्यक्रममा स्मृति प्रतिष्ठानका अध्यक्ष हितराज पाण्डेले बोगटी पार्टीभित्र निष्ठावान् नेता भएकाले उनले देखाएको बाटोमा हिँडेर मुलुकलाई समृद्धितर्फ लैजानुपर्नेमा जोड दिए ।