संविधानले जनतालाई पर्याप्त अधिकार दिएको छ : तिमल्सिना

काठमाडौँ, पुस १३ । राष्ट्रियसभा अध्यक्ष गणेश तिमल्सिनाले संविधान र ऐनमा भएको व्यवस्थालाई पूर्ण कार्यान्वयन गर्न जनताको चेतनास्तर बढाउनुपर्नेमा जोड दिएका छन् ।

समावेशी फाउण्डेशनले आयोजना गरेको कार्यक्रममा बोल्दै उनले लामो संघर्षपछि संविधानसभाबाट बनेको संविधानले दलितलगायत सबै समुदायलाई पर्याप्त अधिकार दिएको बताए ।

संविधान र त्यसअनुसार बनेका मौलिक र अन्य कानूनले जनतालाई पर्याप्त अधिकार दिएको सस्पष्ट पार्दै उनले भने, संविधान र ऐनको पूर्ण कार्यान्वयन गर्न जनतालाई ती अधिकारबारे पर्याप्त जानकारी गराउन जरुरी छ ।

विगतमा निश्चित समयभित्र मौलिक हकसम्बन्धी कानून निमार्ण गर्दा संसद्मा पर्याप्त छलफल हुन नसकेको अध्यक्ष तिमिल्सिनाले स्वीकार गरेका छन् । उनले आगामी दिनमा संसद्ले पर्याप्त छलफल गरी कानून निमार्ण तथा समयअनुसार परिमार्जन गर्ने विश्वास दिलाए ।

कार्यक्रममा दलित समुदायका सांसद तथा अधिकारकर्मीले दलित तथा सीमान्तकृत समुदायका लागि विद्यमान कानूनमा गरिएका व्यवस्था र थप गर्नुपर्ने प्रावधान सम्बन्धी सुझाव दिएका थिए ।