चितवन, माघ ८ । भरतपुर अस्पतालले सञ्चालन गरेको औषधि पसलले गएको छ महीनामा रु एक करोड ८१ लाख ३० हजार नाफा गर्न सफल भएको छ । अस्पतालले सोही मूल्य बराबरको सहुलियत पनि सेवाग्राहीलाई उपलब्ध गराएको जानकारी गराएको छ । गएको छ महीनामा रु छ करोड १५ लाख ६० हजार बराबरको औषधि बिक्री गरिएको अस्पतालको औषधालय प्रमुख रामहरि ढकालका बताए ।
अस्पतालले गत आर्थिक वर्षमा रु नौ करोड ५० लाख २८ हजार बराबरको औषधि बिक्री गरी रु दुई करोड ६० लाख ८० हजार नाफा गरेको थियो । अस्पतालले बोलपत्र आह्वान गरी औषधि खरीद गर्दै आएकाले सेवाग्राहीलाई निजी क्षेत्रको औषधालयभन्दा सस्तो मूल्यमा औषधि उपलब्ध गराउन सकेको अस्पतालका मेडिकल सुपरिटेण्डेन्ट डा कृष्ण पौडेलले बताएका छन् ।
अस्पतालले जति नाफा राख्ने गरेको छ त्यतिनै बराबरको सेवाग्राहीको रकम बचत हुने गरेको स्पष्ट पार्दै उनले भने, बाहिरी औषधालयमा भन्दा ३० प्रतिशतसम्म छुटमा अस्पतालले औषधि बिक्री गर्दै आएको छ । बिरामीको चाप बढ्दै गएपछि अन्तरङ्ग विभागमा शल्यक्रिया, सघन उपचार कक्ष र पोष्टअपका लागि औषधालय थप गरिएको उनले सुनाए ।
अस्पतालले पछिल्लोसहित तीनवटा औषधालय सञ्चालनमा ल्याएको छ । सरकारले तीन वर्षअघि आफ्नै औषधालय सञ्चालन गर्न निर्देशन दिएसँगै भरतपुर अस्पतालले औषधालय सञ्चालन गरेको थियो । छ सय श्ययाको उक्त अस्पतालमा दैनिक एक हजार पाँच सयसम्म बिरामी उपचारका लागि आउने गरेका छन् ।