काठमाडौँ, माघ २८ । प्रथम राष्ट्रपति रनिङ शिल्ड प्रतियोगिता फागुनमा गोकर्णेश्वर नगरपालिकाको आयोजनामा हुने भएको छ ।
माघ २२ देखि २४ गतेसम्म नगरपालिकाले प्रतियोगिता तोकिएपनि विद्यालयको हिँउदे बिदा र अन्य बिदाका कारण फागुनको २१ देखि २३ गतेसम्म प्रतियोगिता गर्न लागिएको जानकारी पाइएको छ ।
बिदा र अन्य कारणले विद्यार्थीलाई खेलको पूर्वतयारी पूरा गर्न नसकेकाले गोकर्णेश्वर नगरपालिकाका प्रमुख सन्तोष चालिसेले नगर शिक्षा समितिको बैठक बसेर प्रतियोगिता फागुनमा गर्ने निर्णय गरेको जानकारी दिएका हुन् । उनले नगरपालिकालाई खेलको माध्यामबाट विकास गर्न सो प्रतियोगिता आयोजना गर्न लागेको बताएका छन् ।
नगरपालिकाले मेयरकप फुटबल प्रतियोगितासमेत सम्पन्न गरिसकेको छ । बालसुधार माध्यामिक विद्यालय नयाँपाटीमा हुने प्रतियोगितामा नगरपालिकाभित्रका सामुदायिक तथा संस्थागत माध्यामिक विद्यालयका विद्यार्थीको सहभागिता रहनेछ ।
प्रतियोगितामा भाग लिन चाहने विद्यार्थी तथा विद्यालयलाई फागुन १० गतेसम्म प्रवेश शुल्क र विद्यार्थी विवरण पेश गर्न नगरपालिकाले आह्वान गरेको छ ।