चट्याङ परी आगलागी हुँदा पाँच लाखको क्षति

तुलसीपुर, फागुन ३ । आज बिहान चट्याङ परी आगलागी हँुदा रु पाँच लाख बराबरको क्षति र एक घाइते समेत भएका छन् । दाङको गढवा गाउँपालिका–७ विजयपुरस्थित बालाराम विकको फुसले छाएको दुईतले कच्ची घरमा एक्कासि चट्याङ परी आगलागी हुँदा विककी श्रीमती ७४ वर्षीय मोती विक आगोले जलेर घाइते भएको जिल्ला प्रहरी कार्यालय दाङले जानकारी गराएको छ ।

आगलागीबाट घरमा रहेको महत्वपूर्ण कागजात, घर, घरमा रहेका काठ दाउरा नष्ट हुँदा रु पाँच लाख बराबरको क्षति भएको प्रहरी नायव उपरीक्षक रामप्रसाद घर्तीले बताए । विकको स्थानीय अस्पतालमा उपचार भइरहेको छ । आगो दमकल, प्रहरी र स्थानीयवासीको सहयोगमा नियन्त्रणमा आएको थियो ।