स्व. जननेता भण्डारीले बोलेका अडियो र भिडियो राख्दै संग्रहालयको निर्माण

मोरङ, साउन १८ । मोरङ स्थित उर्लाबारी वडा नं. ३ मा मदन भण्डारी स्मृति प्रतिष्ठानमा स्व जननेता मदन भण्डारीले प्रयोग गरेका सामग्री, उनका लेख, आलेख, दस्तावेज, साइकलका साथै दासढुंगा दुर्घटनामा परेको जिप राखेर संग्रहालय निर्माण भइरहेको छ ।

यही असोज महिनासम्ममा सम्पन्न हुने गरी निर्माण भइरहेको संग्रहालयमा स्व भण्डारीको जन्म भएको ताप्लेजुङको ढुंगेसाँघुदेखि मृत्यु भएको चितवनको दासढुंगासम्म चित्रित हुने सम्पूर्ण सामग्री सो संग्रहालयमा राखिने प्रतिष्ठानका सामाजिक विकाश अधिकृत रुद्रबहादुर तामाङले जानकारी दिए । स्व. भण्डारीले बोलेका अडियो र भिडियोसमेत उक्त संग्रहालयमा राखिने बताइएको छ ।

संस्कृति तथा पर्यटन मन्त्रालय अन्तर्गत पुरातत्व विभागको सहयोगमा विगत पाँच वर्षदेखि प्रतिष्ठानले संग्रहालयका साथै पुष्पवाटिका तथा बालउद्यान निर्माण गरिरहेको छ । सो योजना निर्माणमा अहिलेसम्म रु एक करोड २५ लाखभन्दा बढी खर्च भइसकेको संग्रहालय निर्माण समितिका संयोजक रोमनाथ ओलीले जानकारी गराए । सो योजना निर्माण सम्पन्न भएसँगै सर्वसाधारणका लागि खुल्ला गरिनेछ ।

स्व जननेता भण्डारीको जीवनको विषयमा जो कोहीलाई पनि बुझ्नलाई सहज होस् भन्ने उद्देश्य राखि उनका योगदानलाई जीवन्त राख्न संग्रहालय निर्माण गरिएको प्रतिष्ठानका अध्यक्ष गुरुप्रसाद बरालले जानकारी दिए ।