ओखलढुङ्गाको व्यापारिक महोत्सवबाट अठार करोड आम्दानी

ओखलढुङ्गा, वैशाख ११। प्राकृतिक सौंन्र्दयताले भरिपूर्ण ओखलढुङ्गामा आन्तरीक तथा वाह्य पर्यटकको चाप केहि समय यता निकै बढेको पाइन्छ । सर्वोच्च शिखर सगरमाथाको फेदिमा पर्ने सो जिल्लामा पुग्न लालायित हुनेहरु प्रशस्तै पाइन्छन् ।  ओखलढुङ्गाको पर्यटन विकासलाई कसरी वढवा दिन सकिन्छ भन्नेमा नै सो जिल्लाको जिम्मेवार व्यक्तिहरुको ध्येय केन्द्रित भएको पाइन्छ ।

ओखलढुङ्गामा सम्पन्न औद्योगिक महोत्सवले रु १८ करोड आम्दानी गरेको जनाइएको छ । गत चैत ३० गतेबाट शुरु भएको ओखलढुङ्गा महोत्सव मङ्गलबार अबेर सकिएको छ । महोत्सवमा स्थानीय जातजातिको वेषभूषा, तामा र फलामका भाडा, ऊनबाट उत्पादित राडी, लम्पट, कृषिजन्य वस्तु, उन्नत जातका पशुवस्तुलगायत विशेष आकर्षणको रुपमा राखिएको थियो । उद्योग वाणिज्य संघले आयोजना गरेको ११ दिने महोत्सवमा विभिन्न शीर्षकमा रु १८ करोड रकम उठाएको जानकारी गराइएको हो ।

पहिलोपटक जिल्लामा आयोजना गरिएको औद्योगिक महोत्सवमा रु १८ करोडको कारोबार भएको संघका अध्यक्ष ज्ञानेन्द्रकुमार मास्केले बताएका छन् । जिल्ला सदरमुकाम बजार क्षेत्रमा पहिलोपटक प्याराग्लाइडिङको उडानसमेत गरिएको थियो । महोत्सवमा दैनिक कलाकारको साङ्गीतिक प्रस्तुति प्रदर्शन लगाएतका अन्य गतिविधीहरु समेत गरिएको थियो ।

ओखलढुङ्गाको पर्यटन प्रर्वदन र समग्र विकासका लागि यस्ता खाले महोत्सवले निकै लाभ दिलाएको छ । स्थानिय उत्पादनले राम्रो बजार पाउनुका साथै सो स्थानका वासिन्दाले केहि हद सम्म लाभ लिने अवसर समेत मिलेको स्थानिय बताउँछन् ।