मोरङ,फागुन १० गते नेपाली कांग्रेसका पूर्वमहामन्त्री कृष्णप्रसाद सिटौलाले पत्रकारहरूसँग कुराकानी गर्दै अविश्वास प्रस्तावका पक्षमा कांग्रेस उभिने बताए । पूर्वमहामन्त्री सिटौलाले प्रदेश सरकारविरुद्ध ल्याइएको अविश्वासको पक्षमा मतदान गर्ने बताएका छन्।
सिटौलाले यस सम्बन्धमा कांग्रेस प्रदेश नम्बर १ को प्रदेश संसदीय दलले निर्णय गरी अविश्वासको पक्षमा मतदान गर्ने प्रस्ट पारे । मुख्यमन्त्री शेरधन राईलाई नेकपाका प्रचण्ड(नेपाल पक्षले अविश्वास प्रस्ताव दर्ता गरेका छन्।
आइतबार उक्त प्रस्ताव प्रदेश सभा बैठकमा पेश भएको छ। यस सम्बन्धी छलफल गर्न फागुन २० मा प्रदेश सभा बैठक बस्दैछ।
सिटौलाले संसद् विघटन गलत रहेको पार्टीको निर्णय स्पष्ट छ भन्दै यसका विरुद्ध देशव्यापीरूपमा आन्दोलन र विरोधका कार्यक्रम सञ्चालन भइरहेको पनि बताए।
उनले संविधानबाट निर्माण भएको सर्वोच्च अदालतले यसको रक्षा गर्ने विश्वास व्यक्त गर्दै यससम्बन्धी विकल्प नदिने आशा व्यक्त गरेका छन्।
उनले संसद् विघटनले वैधानिकता पाएमा क्रमिकरूपमा व्यवस्था समाप्त हुँदै जाने आशङ्का व्यक्त गरेका छन्।
सिटौलाले सर्वोच्चको फैसलापछि सङ्घीय सरकार गठनका सम्बन्धमा निर्णय हुने बताएका छन्।
प्रदेश सरकारमा कसलाई समर्थन गर्नेबारे हालैको कांग्रेस केन्द्रीय समिति बैठकमा वरिष्ठ नेता रामचन्द्र पौडेलले निर्णय गर्नुपर्ने माग गरे पनि कुनै निर्णय भएको थिएन।
पौडेल र सिटौला पक्षले मुख्यमन्त्रीहरू विरूद्ध आएका अविश्वास प्रस्तावमा समर्थन गरेर जानुपर्ने धारणा राख्दै आए पनि सभापति शेरबहादुर देउवाले यसबारे औपचारिक रूपमा धारणा दिएका छैनन्।