पर्वत । पर्वतमा बाढीले गाडी बगाउँदा तीन जना बेपत्ता भएका छन् । कुश्मा नगरपालिका वडा नं ८ चुवास्थित सुन्दरे खोलामा आएको बाढीले गाडी बगाएको थियो । पर्वत प्रहरीका अनुसार बगाएको गाडी भेटिए पनि त्यसमा रहेका तीन जना अझै भेटिएका छैनन् । मंगलबार रातिमा आएको बाढीले मध्यपहाडी लोकमार्ग विस्तारको काम गर्दै आएको लामा कन्ट्रक्सनको गाडी बाढीले बगाएको हो ।
भीषण वर्षाका कारण राति खोला उर्लिएर आएकाले त्यहाँबाट अन्यत्र जान खोला पार गर्न खोज्दा गाडी बगाएको बताइएको छ । सो गाडीमा सवार एक इन्जिनियर, चालक र एक सर्वसाधारण रहेको जिल्ला प्रहरी कार्यालय पर्वतका प्रहरी नायव उपरीक्षक शिवराज बुढाथोकीले जानकारी दिए ।
बेपत्ता हुनेमा प्रोजेक्ट कोअर्डिनेटर राजाराम आचार्य, चालक ईन्द्र चौधरी र परिचय खुल्न नसकेका एक स्थानीय छन् । प्रहरीले राति १२ बजेदेखि नै खोजी गरिरहे पनि अवस्था पत्ता लाग्न सकेको छैन । पहिरोले बगाएको गाडी भने आज बिहान मोदी खोलामा फेला परेको उनले बताए ।