अमेरिकाले दिएको कोरोनाविरुद्धको १५ लाख डोज खोप आइपुग्यो

काठमाडौं । अमेरिका सरकारले नेपाललाई निःशुल्क उपलब्ध गराएको १५ लाख डोज खोप नेपाल आइपुगेको छ । अमेरिकाले दिएको उक्त जोनसन एन्ड जोनसन कम्पनीले उत्पादन गरेको हो । अमेरिकाले कोभ्याक्स सहयोगमार्फत सो परिमाणको खोप नेपाललाई अनुदान दिएको हो ।

अमेरिकाले उपलब्ध गराएको कोरोनाविरुद्धको खोप कतार एयरवेजको नियमित उडानमार्फत् आज बिहान ९ बजे काठमाडौं आइपुगेको छ । खोपबारे अमेरिकी दूतावासले पत्रकार सम्मेलनमार्फत् जानकारी गराउँदै छ । पत्रकार सम्मेलनमा स्वास्थ्य मन्त्रालयको जिम्मेवारीसमेत सम्हालेका शिक्षामन्त्री कृष्णगोपाल श्रेष्ठ तथा अमेरिकी राजदूत रेन्डी बेरीले सम्बोधन गरेका छन् ।

केही दिनअघि मात्र नेपालका लागि अमेरिकी राजदूत र्बेरीले अमेरिकाले १५ लाखभन्दा बढी नेपालीलाई पुग्नेगरी कोभिड–१९ खोप निःशुल्क उपलब्ध गराउन लागेको जानकारी दिएका थिए । सोही अनुसार आज अमेरिकाबाट नेपालमा जोनसन एन्ड जोनसन कम्पनीको १५ लाख खोप नेपाल आइपुगेको छ ।