आज चीनबाट ८ लाख डोज भेरोसिल खोप आउँदै

काठमाडौँ । चीनबाट आज ८ लाख डोज भेरोसेल खोप नेपाल ल्याइँदैछ । खोप ल्याउन बुधबार नेपाल वायु सेवा निगमको जहाज चीन गएको थियो । सो जहाज आज दिउँसो खोप लिएर काठमाडौँ पुग्ने छ । आजै फेरि जहाज अरु खोप लिन बेइजिङ जाने छ ।

त्यसैगरी शनिबार र आइतबार पनि जहाज खोप ल्याउन चीन जान जनाइएको छ । यसअघि असार २५ गते आठ लाख मात्रा खोप चीनबाट ल्याइसकिएको छ । त्यसपछि चीनले नेपाललाई थप १६ लाख डोज खोप अनुदानमा दिने जनाइसकेको छ । केही दिनभित्रै अनुदान र खरिद गरेको गरी २५ लाख डोज खोप आउने स्वास्थ्य मन्त्रालयको भनाइ छ ।

यसअघि चीनले १८ ला८ख डोज खोप अनुदानमा दिएको थियो । त्यसैगरी कोरोना विरुद्धको खोप अभियानअन्तर्गत अमेरिकी सरकारले उपलब्ध गराएको जोन्सन एण्ड जोन्सन खोप अहिलेसम्म ८१ हजारभन्दा बढीले लगाइसकेका छन् ।

जोन्सन एण्ड जोन्सन खोप अभियान अहिले बागमती र गण्डकी प्रदेशमा मात्र सञ्चालनमा ल्याइएको स्वास्थ्य तथा जनसंख्या मन्त्रालयले जनाएको छ । अमेरिकाले उपलब्ध गराएको जोन्सन एण्ड जोन्सनको १५ लाख ३४ हजार ८५० डोज खोप असार २८ गते नेपाल आइपुगेको हो । वैज्ञानिक हिसाबले यो खोप एक डोज मात्रै लगाउँदा हुने बताइएको छ ।