फुटबल संघको अध्यक्षमा केसी विजयी

बुटवल, पुष १८ ।  रुपन्देही जिल्ला फुटबल संघको अध्यक्षमा ऋषि ज्ञवालीलाई पराजित गर्दै दीर्घबहादुर केसी (कुमार)विजयी भएका छन् ।   रुपन्देहीका २० मध्ये १९ क्लब चुनावमा सहभागी भएका थिए । खसेको १९ मध्ये १४ मत प्राप्त गरी केसी दोश्रो कार्यकालका लागि अध्यक्षमा निर्वाचित भएका हुन् ।

भ्रष्टाचारको आरोपमा अन्तरास्ट्रिय  फुटबल महासंघ फिफाबाट प्रतिबन्धमा परेका एन्फाका पूर्व अध्यक्ष गणेश थापा केसीलाई हराउने अभियानमा जुटेका थिए । तर उनको आग्रहलाई अस्वीकार गर्दै रुपन्देहीका क्लबहरुले केसीलाई नै अध्यक्षमा चयन गरेका हुन्  ।

फुटबलमा प्रतिबन्धमा परे पनि आफ्नो पक्षमा लबिङ थालेको भन्दै फुटबल क्षेत्रकै व्यक्तिहरु थापाप्रति आक्रोशित बनेका थिए । थापाले एन्फामा रहँदा आर्थिक हिनामिन गरेको भन्दै एन्फाका पूर्वउपध्यक्ष कर्माछिरिङ शेर्पाले सुरु गरेको शुद्धीकरण अभियानलाई साथ दिएका कारण थापा केसीलाई हराउने योजनामा थिए । एन्फाले माघ ५ गतेसम्म चुनाव गर्न ४५ वटा जिल्लाका संघलाई निर्देशन दिएको थियो । जस अनुसार चुनाव भएको रुपन्देही नवौं जिल्ला हो । जिल्ला अधिवेशन सकिएपछि चैत १४ गते एन्फाको चुनाव हुनेछ ।

सोमबार राती भएको चुनावबाट संघको उपाध्यक्षमा भुपेन्द्रबहादुर क्षेत्री (हरि ) मुकेह कुँवर र खेमराज गुरुङ विजयी भए । सदस्यहरुमा होम गलामी, सोमबहादुर थापा (सुरज), पदमबहादुर थापा (अशोक), जुक्तबहादुर थापा, मनोजकुमार थापा, इसान भण्डारी, शंकर मल्लाह र प्रेम राना विजयी भए  । संघको पहिलो बैठकले महासचिव, सचिव र कोषाध्यक्ष मनोनित गर्ने छ ।

यसअघि साधारणसभाको उद्घाटन गर्दै बुटवल उपमहानगरपालिकाका प्रमुख शिवराज सुवेदीले बुटवललाई खेलग्रामको रुपमा विकास गर्ने उपमहानगरको योजना रहेको बताए ।

एन्फाका केन्द्रीय वरिष्ठ उपाध्यक्ष मणि कुँवरले रुपन्देही जिल्ला फुटवलमा संभावना बोकेको क्षेत्र भएको भन्दै सहयोगका लागि एन्फा तयार रहेको बताए ।