दोस्रो खुकुरी टि–ट्वान्टी क्रिकेट माघ १० देखि शुरु

काठमाडौँ, माघ ७ । दोस्रो खुकुरी च्यालेन्ज टि–ट्वान्टी कप क्रिकेट प्रतियोगिता यही माघ १० गतेदेखि शुरु हुँदैछ ।

खुकुरी इएनटीको आयोजनामा यही माघ १० देखि फागुन ५ गतेसम्म हुने सो प्रतियोगिताको सम्पूर्ण तयारी पूरा भएको आयोजक संस्थाका अध्यक्ष अध्यक्ष विनयविक्रम थापाले बताएका छन् ।

आज इएनटीद्वारा आयोजित पत्रकार सम्मेलनमा जानकारी गराइए अनुसार र कीर्तिपुरस्थित अन्तराष्ट्रिय क्रिकेट मैदान र मूलपानी क्रिकेट मैदानमा हुने सो प्रतियोगितामा विभिन्न २० टोलीले सहभागिता जनाउनेछन् । सहभागी टोलीलाई चार समूहमा विभाजन गरिएको छ ।

सहभागी टोलीहरुले सन् २०१५ देखि राष्ट्रिय टोलीमा आबद्व चार खेलाडी राख्न पाउने प्रावधान रहेको आयोजकले बताएको छ । तर खेलका दौरानमा भने तीन खेलाडी मात्र खेल्न पाउनेछन् । प्रतियोगिताका विजेताले रु तीन लाख तथा उपविजेताले रु एक लाख प्राप्त गर्नेछन् ।

त्यस्तै, प्रतियोगिताको उत्कृष्ट खेलाडीले रु २० हजार पाउनेछन् भने उत्कृष्ट बलर तथा ब्याट्सम्यानले जनही रु दश हजार प्राप्त गर्नेछन् ।