शुक्रबारदेखि एक महिनासम्म आयोडिन महिना मनाइने

काठमाडौँ, माघ १८ । साल्ट ट्रेडिङ कर्पोरेशनले आयोडिनको कमीबाट हुने रोगलाई निवारण गर्ने उद्देश्यले शुक्रबारदेखि फेब्रूअरी महिनालाई आयोडिन महिनाका रुपमा मनाउने भएको छ ।

सन् १९९८ देखि उक्त महिनालाई आयोडिन महिनाका रुपमा मनाउँदै आइएको छ । चिकित्सकका अनुसार खासगरी आयोडिनको कमीले गलगाड हुने गर्दछ । लामो समयदेखि सरकारले नूनमा आवश्यक मात्रामा आयोडिन मिलाई कर्पोरेशनमार्फत देशभरि नै बिक्री वितरणको प्रबन्ध मिलाएपछि उक्त रोग हाल नेपालबाट निवारण भएको विश्व स्वास्थ्य संगठनले बताएको छ ।

सन् १९८५ मा सो रोगीको संख्या ४४ प्रतिशत रहेको थियो भने सन् २००७ मा शून्य दशमलव चारमा झरेको थियो । अर्कोतर्फ सन् २०१६ को पछिल्लो स्वास्थ्य सर्वेक्षण अनुसार पाँच वर्षमुनिका ९५ प्रतिशत बालबालिकाले आयोडिनयुक्त नूनको उपभोग गरेको देखिएको थियो ।

सरकारले सन् २०१८ को अन्तिमसम्ममा आयोडिनयुक्त नूनको उपभोग गर्ने घर संख्या ९५ प्रतिशत पुर्याउने लक्ष्य राखेको छ । युनिभर्सल साल्ट आयोडाइजेशनको सदस्य देश नेपाल पनि हो । कर्पोरेशनले हुम्ला, जुम्ला, कालीकोट, जाजरकोट, डोल्पा र मुगुको नूनको मौज्दात रहेको र ती जिल्लामा नूनको अभाव नभएको बताएको छ ।