काठमाडौँ, चैत ६ । उद्योग, वाणिज्य तथा आपूर्ति मन्त्री मातृका यादवले नेपालका कृषिजन्य वस्तुको भारत निर्यातमा मद्दत गर्न अनुरोध गरेका छन् ।
विश्व व्यापार संगठनको अनौपचारिक मन्त्रिस्तरीय बैठकमा भाग लिने सिलसिलामा भारतको नयाँ दिल्लीमा रहेका उद्योग, वाणिज्य तथा आपूर्ति मन्त्री यादवले भारतीय वाणिज्य मन्त्री सुरेश प्रभुलाई भेटेर उनले नेपाल–भारत सीमाका मुख्य भन्सार नाकामा व्यापारजन्य पूर्वाधार निर्यात, नेपालमा भारतीय लगानी वृद्धिलगायत पारस्परिक व्यापार अभिवृद्धिबारे आफ्ना भारतीय समकक्षीको ध्यानाकर्षण गराएको उद्योग, वाणिज्य तथा आपूर्ति मन्त्रालयले बताएको छ ।
सो अवसरमा नेपालमा उत्पादनको उच्च सम्भावना भएका वस्तुमा लगानी वृद्धि गर्न र व्यापारजन्य क्षमता विकासमा परिणाम देखिने गरी काम गर्न भारत इच्छुक रहेको जानकारी भारतका वाणिज्य मन्त्रीले दिएका थिए ।
भेटमा दुवै मन्त्रीले आगामी महिना काठमाडौँमा आयोजना हुने वाणिज्य सचिवहरुको बैठकलाई सफल बनाउने सम्बन्धमा पनि छलफल गरेका थिए ।