काठमाडौं, चैत २० । मंगलबार बसेको प्रतिनिधिसभाको बैठकले ‘राष्ट्रिय चिकित्सा शिक्षा अध्यादेश २०७४’ बहुमतले पारित गरेको छ ।
शिक्षा, विज्ञान तथा प्रविधि मन्त्री गिरिराजमणि पोखरेलले पेश गरेको चिकित्सा शिक्षा अध्यादेश पारित भएको हो । नेपाल मजदुर किसान पार्टीका सांसद प्रेम सुवालले राखेको फरक मत भने अस्वीकृत गरिएको छ ।
यस अध्यादेशमा रहेका कमीकमजोरी प्रतिस्थापन विधेयकमार्फत पारित गर्ने गरी अध्यादेश पास भएको हो । मंगलबार नै बसेको मन्त्रिपरिषद्को बैठकले प्रतिस्थापन विधेयक ल्याउने निर्णयसमेत गरिसकेको छ ।
सांसद प्रेम सुवालले अध्यादेशमा काठमाडौं उपत्यकामा १० वर्ष खोल्न नदिने, निजी मेडिकल कलेज खारेज हुनुपर्ने, एमबिबिएसका लागि ३ सय शय्या र नर्सिङमा पनि एक सय शय्या हुने, ५ भन्दा बढी कलेजलाई सम्बन्धन दिन नपाउने लगायतका विषयमा फरक मत व्यक्त गरेका थिए ।
अध्यादेशमा भएका कमजोरी प्रतिस्थापन विधेयकमा सच्याउने सकिने भन्दै शिक्षामन्त्री पोखरेलले पास गर्न प्रस्ताव गरेका थिए ।
उक्त अध्यादेश निकै ठूलो बहस र छलफलपछि ल्याइएको भन्दै उनले थप व्यवस्थित र मर्यादित बनाउन सकिने धारणा व्यक्त गरे ।