काठमाडौं, चैत २७ । प्रसिद्ध सांस्कृतिक ऐतिहासिक महत्व बोकेकोे लिच्छवीकालीन बिस्केट जात्रा आजदेखि सुरु भएको छ ।
वैशाख ५ गतेसम्म धुमधामका साथ मनाइने बिस्केट जात्रा बिहान भैरवनाथको नित्य पुजासँगै सुरु हुने प्रचलन छ । प्रत्येक वर्ष नयाँं वर्षको आगमनसँंगै भक्तपुरमा हुने बिस्केट जात्रा भक्तपुरको पाँंचतल्ले मन्दिर अगाडि राखेर बनाइएको भैरवनाथको रथलाई तानेर जात्रा सुरु गरिन्छ ।
भक्तपुर नगरको मध्य भागमा रहेको मानिने पाँचतल्ले मन्दिरको माथिल्लो टोल र तल्लो टोल गरी दुवैतिर डोरीको माध्यमले रथलाई तानतान गरिन्छ । करिब ३५ फिट अग्लो तीनतल्ले प्यागोडा शैलीमा काठैकाठबाट निर्माण गरिएको रथलाई सयौं युवाले तान्ने चलन रहेको छ ।
जात्राको सुरुको दिन रथलाई भक्तपुर नगरको तल्लो भागतिर तानेर लाने चलन छ । रथलाई पाँंचतल्ले मन्दिरबाट तल्लोतिरका गहिटी, नासमना, वंशगोपाल, भार्वाचोसम्म तानेर लाने चलन छ । यसैबिच, जात्रालाई शान्तिपूर्ण बनाउन स्थानीय प्रशासनले सुरक्षा व्यवस्था कडा बनाएको छ ।
भक्तपुरका प्रमुख जिल्ला अधिकारी द्रोण पोखरेलका अनुसार जात्रा हुने ३४ स्थानमा सिसी टिभी क्यामरा जडान गरेर निगरानीको व्यवस्था मिलाइएको छ । यसबाहेक जात्राको सुरक्षाका लागि एक हजार ३०० भन्दा बढी सुरक्षाकर्मी परिचालन गरिएको छ ।
जात्रा अवधिभर भक्तपुरमा मदिरा बिक्री वितरणमा रोकसमेत लगाइएको छ । झगडा गर्ने एवं ढुंगा हान्नेलाई सार्वजनिक ऐन अन्तर्गत मुद्दा चलाएर कारवाही गरिने प्रमुख जिल्ला अधिकारी पोखरेलको भनाइ छ ।