काठमाडौँ, वैशाख ३० । आगामी आर्थिक वर्षको बजेट जनचाहना र विकासप्रतिको आशा र चाहनालाई सम्बोधन गर्दै ल्याउनुपर्नेमा जोड दिइएको छ ।
प्रतिनिधिसभाको आज बसेको बैठकमा आव २०७५/७६ का लागि विनियोजन विधेयकका सिद्धान्त र प्राथमिकता (कर प्रस्तावबाहेक) को छलफलमा विचार व्यक्त गर्ने अधिकांश सांसदले जिम्मेवारी बहन गर्नुपर्ने निकायलाई जिम्मेवार बनाई बजेटको प्रभावकारी कार्यान्वयन गर्ने तथा व्यावहारिक रुपमा आर्थिक समृद्धिको कार्ययोजनालाई प्रस्तुत गर्न जोड दिएका थिए ।
समृद्धिका लागि आत्मबल तयार पार्ने तवरले बजेट आउनुपर्ने भन्दै सांसदले वर्तमान सरकारप्रति जनताको असाधारण विश्वास रहेको विषयलाई सम्बोधन गर्नुपर्ने विचार व्यक्त गरे । सरकारले ‘समृद्ध नेपाल, सुखी नेपाली’को अवधारणा अगाडि बढाएको सन्दर्भमा पर्यटन, कृषि, ऊर्जा, जडीबुटी र जंगलमा विशेष लगानी गर्नुपर्छ भन्दै उनीहरुले वास्तविकतामा आधारित बजेट जरुरी रहेको बताए ।
सत्तापक्षका सांसदले अर्थमन्त्री डा युवराज खतिवडाले प्रस्तुत गरेको विनियोजन विधेयकका सिद्धान्त र प्राथमिकतालाई समर्थन जनाएका थिए भने प्रतिपक्षी दलका सांसदले भने वर्तमान सरकारले दिशाहीन र नेपाली जनताले खासै नयाँपन पाउने खालको प्रस्ताव नआएको गुनासो व्यक्त गरेका थिए ।
नेकपा (माओवादी केन्द्र)का जनार्दन शर्माले बजेट कार्यान्वयनमा ढिलासुस्ती गर्ने प्रवृत्तिको निरुत्साहन गर्नुपर्नेमा जोड दिए । उनले भने– नेताले भाषण मात्रै गर्ने, किसानले खेती नगर्ने, कर्मचारीले काम नगर्ने प्रवृत्तिविरुद्ध जागृति अभियान चलाउनुपर्छ , बजेट पूर्णरुपमा कार्यान्वयन गर्नुपर्छ ।
उनले ठूला कार्यक्रमलाई जोड दिएर यथेष्ट बजेट उपलब्ध गराउन माग गरेका छन् । माओवादी केन्द्रका कमला रोकाले आधा धर्ती र आधा आकाश ढाकेका महिलाको हितमा बजेट ल्याउनुपर्नेमा जोड दिएकी थिइन् ।
पूर्वअर्थमन्त्रीसमेत रहेका नेकपा (एमाले)का विष्णुप्रसाद पौडेलले नेपाली जनताको आत्मबल बढाउने र आर्थिक समृद्धिको आधार तयार पार्ने खालको बजेट ल्याउन सरकारलाई सुझाव दिए । उनले भने–आर्थिक समृद्धिको नाराको व्यावहारिक कार्यान्वयन गर्ने खालको बजेट आवश्यक छ ।
संसद्मा प्रस्तुत विनियोजन विधेयकका सिद्धान्त र प्राथमिकतामा प्रभावकारी र व्यावहारिक विषय समेटिएकाले त्यसलाई मूर्त रुप दिने बजेट जरुरी छ । एमालेकै भानुभक्त ढकालले समाजवादी अर्थ व्यवस्थाको आधार तयार पार्नेखालको बजेट ल्याउनुपर्ने बताए ।
नेपाली काँग्रेसका नेता एवं पूर्वअर्थमन्त्री ज्ञानेन्द्रबहादुर कार्कीले विगतका सरकारलाई आरोप लगाउने सरकारले हचुवाका भरमा बजेटका सिद्धान्त प्रस्तुत गरेको दोषारोपण गरे । काँग्रेसकै दिलेन्द्रप्रसाद बडूले शिक्षा क्षेत्रमा ३० प्रतिशत बजेट विनियोजन गर्न सरकारको ध्यानाकर्षण गराए ।
काँग्रेसका प्रदीप गिरीले रोजगार र सामाजिक सुरक्षाको विषयलाई प्राथमिकतामा राखेर बजेट प्रस्तुत गर्न सुझाए । प्रतिनिधिसभाको अर्को बैठक सोमबार बिहान ११ः०० बजे बस्नेछ ।