काठमाडौँ, वैशाख ३० । बैंक तथा वित्तीय क्षेत्रमा रहेको जनताको रकमको सुरक्षाका लागि राष्ट्र बैंक प्रतिबद्ध रहेको नेपाल राष्ट्र बैंकका गभर्नर डा चिरञ्जीवी नेपालले बताएका छन् ।
मेगा बैंक र टुरिजम डेपलपमेन्ट बैंक एक आपसमा गाभिएपश्चात एकीकृत कारोबार सञ्चालनको आज शुभारम्भ गर्दै गभर्नर नेपालले बैंकमा प्रवद्र्धकको रकम १० प्रतिशत र जनताको रकम ९० प्रतिशत हुने भएकाले जनताको रकम सुरक्षित हुनुपर्ने जनाए ।
बैंकिङ क्षेत्र अन्य क्षेत्रजस्तो मलग्ने प्रतिफल दिने संस्था होइन भनेर आफूले निरन्तर सचेत गराए पनि केही बैंक तथा वित्तीय संस्थाले नसुनेकामा उनले असन्तुष्टी व्यक्त गरे । प्रवद्र्धकले बैंक व्यवस्थापनलाई दबाब दिएर जनताको पैसालाई गलत तरिकाले उपयोग गर्न नुहुनेमा जोड दिंदै गर्भनर डा नेपालले जनताको पैसा नडुबोस् भन्ने सोच्नु नियामक निकायको मूल दायित्व रहेको, हामी जनताको पैसा तलमाथि हुन दिन्नौं भने ।
आर्थिक विकासका लागि अत्यन्त राम्रो अवसर रहेको भन्दै उनले राजनीतिक स्थायित्वले नीतिगत स्थायित्व ल्याउने र त्यसले मुलुकलाई समृद्धिको बाटोमा अगाडि बढाउने बताए । आयात कम गर्ने र निर्यातलाई बढवा दिने क्षेत्रमा बैंकले लगानी बढाउनुपर्नेमा जोड दिँदै गभर्नर नेपालले बैंकिङ क्षेत्र नपुगेको ठाउँमा गएर लगानी गर्नुपर्नेमा जोड दिएका छन् ।
साविकको टुरिजम डेभलपमेन्ट बैंकका सञ्चालक समितिका अध्यक्ष तथा राष्ट्रिय योजना आयोगका उपाध्यक्ष डा पुष्पराज कँडेलले सञ्चालक समितिको स्वार्थमा ऋण प्रवाह गर्दा बैकिङ क्षेत्रमा समस्या आउने गरेको भन्दै त्यसतर्फ ध्यान दिनुपर्नेमा जोड दिए ।
मेगा बैंकका अध्यक्ष भोजबहादुर शाहले दुई बैंक एकीकृत भई कारोबार भएकोप्रति खुशी जनाउँदै आगामी दिनमा देशको आर्थिक समृद्धिमा मद्दत पुर्याउने गरी बैंकलाई अगाडि बढाउने बताएका छन् ।
मेगा बैंकको चुक्ता पूँजी रु ९ अर्ब २९ करोड पुगेको छ भने निक्षेप रु ९६ अर्ब ५५ करोड पुगेको छ भने देशको सात वटै प्रदेशमा फैलिएका ९१ शाखाबाट पाँच लाख लगानी ग्राहकलाई अत्याधुनिक बैंकिङ सेवा दिनुका साथै रु ५५ करोड ७० लाख लगानी गरेको बताइएको छ ।