लहान, जेठ ९ । राष्ट्रिय गौरवको योजना मानिएको सुनसरीको धरान–चतरा, गाईघाट–कटारी र सिन्धुली–हेटौँडा सडक आयोजनाको पूर्वी खण्ड निर्माण तीव्र रुपमा अघि बढेको छ । करिब डेढ वर्षअघि निर्माण शुरु भएको वैकल्पिक उक्त राजमार्गको करीब ३५ प्रतिशतभन्दा बढी काम पूरा भइसकेको आयोजना कार्यालय गाईघाटले जानकारी गराएको छ । धरान–चतरा, गाईघाट–कटारी तथा सिन्धुली–हेटाँैडा सडक आयोजना पूर्वी खण्डमा १३४ किलोमिटर सडक पर्छ । सडक ११ मिटर फर्मेशन चौडाइ भएको कालोपत्रयुक्त हुने आयोजना कार्यालयले बताएको छ ।
भित्री मधेशलाई काठमाडौँसँग जोडने सबैभन्दा छोटो सो राजमार्गको सुनसरी, उदयपुर र सिन्धुली खण्डमा सडक संरचना र पुल निर्माण गर्ने काम धमाधम अघि बढ्दै छ । उदयपुरको चौदण्डीगढी नगरपालिका–४ वीरेन्द्र चोकदेखि सिन्धुलीको भिमान सम्मका विभिन्न भागमा कल्भर्ट र पुलपुलेसा निर्माण भइरहेका छन् ।
घरटहराको मुआब्जा निर्धारण, वन क्षेत्रका रूख हटाउने कार्य र पुल निर्माण हुने स्थानमा भएको विवाद मेलमिलाप भएसँगै सडक निमार्णले गति लिएको निमार्णाधीन धरान–चतरा, गाईघाट–कटारी र सिन्धुली–हेटौँडा सडक आयोजना पूर्वी खण्ड गाईघाटका आयोजना प्रमुख उमेशविन्दु श्रेष्ठले जानकारी गराएका छन् ।
आर्थिक प्रगति लक्ष्यअनुसार भएका कारण आयोजनाको कामले तीव्रता लिएको र हालसम्म भौतिक रूपमा ३५ प्रतिशतभन्दा बढी काम सम्पन्न भइसकेको छ । सडक विस्तार हुने सिन्धुली क्षेत्रमा मुआब्जा निर्धारण भइसकेको र घरटहराका कारणले काम रोकिने अवस्था अन्त्य भएकोले छिट्टै निर्माण सकिने श्रेष्ठले बताए ।
आयोजन प्रमुख श्रेष्ठले उदयपुरतर्फको मुआब्जासम्बन्धी फाइल जिल्ला प्रशासन कार्यालयमा पेश गरी सकिएकोे जानकारी गराएका छन् । मुआब्जाको निवेदन दिन छुटेकाका लागि निवेदन दिन र लगत कट्टा गर्न शुरु भइसकेको छ । केही दिन भित्रै मुआब्जाको विषय टुंगिने समेत उनले बताए । विभिन्न स्थानमा सडकको सब ग्रेड, सब बेस, होम पाइप, स्लाभ कल्भर्ट, मेसिनरी वाल लगायतका काम भइरहेको निर्माण व्यवसायी जेडआइइसी शर्मा लामा जोइन्ट भेन्चरका डेपुटी कन्ट्याक्ट म्यानेजर इन्जिनियर सीताराम दाहालले बताएका छन् । उदयपुरतर्फ निर्माणमा खासै अवरोध नभए पनि सिन्धुलीतर्फ विद्युतको कारणले गर्दा पोल हटाउन ढिला सुस्ती भएको हो ।
२०७३ साल कात्तिक २२ गते सडक योजना तीन वर्षभित्र सम्पन्न गर्ने गरी निर्माण गरिसक्ने लक्ष्य राखी निर्माण व्यवसायी जेडआइइसी शर्मा लामा जोइन्ट भेन्चरसँग रु सात अर्ब ३६ करोड ९९ लाख ८४ हजारमा ठेक्का सम्झौता भएको थियो । राजमार्गले उदयपुरको वेलका नगरपालिका, चौदण्डीगढी नगरपालिका, त्रियुगा नगरपालिका, उदयपुर गढीगाउँपालिका र कटारी नगरपालिकाका स्थानीयवासीलाई फाइदा पुग्नेछ भने सिन्धुलीतर्फ दुधौली नगरपालिका र कमलामाई नगरपालिका हुँदै हेटौँडासम्म सडक पुग्नेछ ।
वैकल्पिक मार्गको निर्माणमा अवरोध नआए निर्धा्रित समयमै निमार्ण सम्पन्न हुने स्थानीयवासी बताउँछन् । आफ्नै घरआँगनमा राजमार्ग निर्माण शुरु भएसँगै स्थानीयवासीमा रौनक बढेको छ । राजमार्ग बनेपछि काठमाडौँसँग सहज यातायातको पहँुच हुनेछ भन्नेमा गाउँबासी स्थानीय वासिन्दा हर्षित छन् ।