काठमाडौँ, जेठ २१ । लगातार बढ्दै आएको पेट्रोलियम पदार्थको मूल्य वृद्धि फिर्ता लिई उपभोग्य वस्तुमा बढेको महँगी घटाउन देशभक्त जनगणतान्त्रिक मोर्चा नेपालले सरकारसँग माग गरेको छ ।
मोर्चाका अध्यक्ष सिपी गजुरेलले आज एक विज्ञप्तिमार्फत ‘समृद्ध नेपाल र सुखी नेपाली’को नारा लगाउँदै आएको वर्तमान सरकारले पेट्रोलियम पदार्थको पाँचौँ पटक मूल्य वृद्धि गरेको बताएको छ ।
पेट्रोलियम पदार्थको मूल्य वृद्धिको असरले चौतर्फी रुपमा बढेको महँगी नागरिकका लागि थेगी नसक्नु भएको भन्दै मोर्चाले उपभोग्य वस्तुमा बढेको महँगी घटाउन तुरुन्त कदम चाल्न सरकारसँग माग राखेको हो ।