एकाएक चर्चामा आएका अशोक दर्जीले गाएको पहिलो गीत ‘मन बिनाको धन’ ले युट्युबमा करोड बढी भ्यूअर्स कमाएको छ । यो गीतको लोकप्रियतासँगै कलाकारिता क्षेत्रका दर्जीको उचाइ ह्वात्तै बढेको छ ।
यसै गीतका कारण उनी एक चर्चित सेलिव्रेटी बन्न सफल भएका छन् । उनी अहिले जो कोहीको पनि चासोको विषय बनेका छन् । हालैमात्र मलेसियाको सांगीतिक कार्यक्रम सकेर नेपाल फर्किएका अशोक दर्जीलाई गीत गाउनका लागि निकै अफर आइसकेका छन् । तर, उनी अब आफ्नो पढाइलाई महत्व दिन चाहन्छन् ।
अशोकलाई अहिले संगीतकार तथा गायक टंक बुढाथोकीले ‘गाइड’ गरिरहेका छन् । हालै प्राप्त जानकारी अनुसार उनलाई अहिले गायनका लागि मात्र नभएर अभिनयका लागि नेपाली चलचित्रबाट समेत अफर आएको छ ।
केही निर्देशकले संगीतकार बुढाथोकीको अफिसमा पुगेर अशोकलाई लिएर चलचित्र निर्माण गर्न चाहेको इच्छा व्यक्त गर्ने गर्दछन् । केही निर्देशक अशोककै कथामा चलचित्र बनाउने सोच व्यक्त गर्छन । तर अहिले उसको चलचित्र गर्ने बेला भएको छैन’, टंकले भने ।
हाल सांगितिक क्षेत्रमा अशोकका असंख्य प्रशंसकहरु छन् । उनी जहाँ जान्छन् त्यहाँ अचेल उनका फ्यानहरुको भीड नै लाग्ने गरेको छ । उनको यो लोकप्रियतालाई क्यास गर्न निर्माता र निर्देशकहरुले आफ्नु चलचित्रको पात्र बनाउन खोज्नु कुनै अनौठो कुरा भने होइन ।
अशोकका लागि अहिलेको समय भनेको पढाइलाई फोकस गर्ने हो । उनलाई यस्तो समयमा उनका सामुन्ने ठूला–ठूला सपना देखाएर लोभ्याउनुले उनको भविष्यका लागि भने घातक हुन सक्छ ।