काठमाडौँ, असार २१ । नेपाल कम्युनिष्ट पार्टी(नेकपा)को आज बसेको स्थायी कमिटी बैठकले पार्टीको नियमावलीमा प्राप्त सुझाव समेटेर अन्तिम रुप दिने जिम्मेवारी सचिवालयलाई दिएको छ ।
पार्टी एकतापछि आज बसेको स्थायी कमिटी दोस्रो बैठकमा पार्टीका मातहत र जनसंगठनका कमिटी तथा पदाधिकारी संख्या र समावेशिताका बारेमा सुझाव प्राप्त भएको र त्यसलाई ध्यान दिएर सचिवालय बैठकले टुङ्गो लगाउने निर्णय भएको प्रवक्ता नारायणकाजी श्रेष्ठले बताए । स्थायी कमिटीमा ४५ सदस्यीय रहेका छन् ।
श्रेष्ठले सचिवालयको बैठक छिट्टै बस्ने जानकारी गराउँदै नियमावली पारित भएपछि मातहतको संगठनबीच एकता कार्य हुने बताए । प्रधानमन्त्री निवास बालुवाटारमा अध्यक्ष केपी शर्मा ओली र पुष्पकमल दाहाल ‘प्रचण्ड’सहितका नेता सम्मिलित स्थायी कमिटीको बैठकमा प्रधानमन्त्रीसमेत रहेका अध्यक्ष ओलीले समसामयिक राजनीतिक स्थिति तथा आफ्नो हालैको चीन भ्रमणका उपलब्धिबारे अवगत गराएका थिए ।
प्रधानमन्त्री ओलीले चीन र भारतका भ्रमणबाट ती मुलुकसँग नेपालको स्वतन्त्र परराष्ट्र नीतिका आधारमा राम्रो र प्रभावकारी सम्बन्ध विकास भएको तथा आपसी हितमा सम्झौता भएको जानकारी गराएका थिए । तीनै तहका सरकारको समग्र समीक्षा गरी कामलाई प्रभावकारी बनाउने बारेमा स्थायी कमिटीको अलग्गै बैठक बस्ने समेत तय भएको प्रवक्ता श्रेष्ठले जानकारी गराए ।