काठमाडौँ, भाद्र १ । भारतीय जनता पार्टीका संस्थापक नेता एवं नेपालका अनन्य शुभचिन्तक भारतका पूर्वप्रधानमन्त्री अटल बिहारी वाजपेयीको हिजो भएको निधनको खबरबाट आफू र आफ्नो पार्टी नेपाली कांग्रेसलाई स्तब्ध बनाएका नेपाली कांग्रेसका सभापति शेरबहादुर देउवाले बताएका छन् ।
सभापति देउवाले हिजो एक शोक सन्देश जारी गरी स्वर्गीय वाजपेयी नेपाल र नेपाली जनताका एक परम मित्र र नेपालप्रति सधैँ शुभेच्छा राख्ने राजनेता भएको स्मरण गर्दैै आधुनिक भारतको निर्माणमा विकासको नयाँ बाटो देखाउन स्वर्गीय वाजपेयीको ठूलो योगदान रहेको उल्लेख गरेका छन् ।
बाजपेयीको निधनले दक्षिण एशियाकै लोकतन्त्रवादी व्यक्तित्व गुमेको अनुभव आफूलाई भएको श्री देउवाले जानकारी गराएका छन् । देउवाले स्वर्गीय अटल बिहारी वाजपेयीप्रति भावपूर्ण श्रद्धाञ्जलि अर्पण गर्दै उनको आत्माको चिरशान्तिको कामना गरेका छन् ।
साथै सभापति देउवाले शोकको यस घडीमा भारत सरकार, भारतीय जनता तथा स्वर्गीय वाजपेयीका समस्त परिवारजन र आफन्तजनप्रति गहिरो समवेदना व्यक्त गरेका छन् ।
