काठमाडौँ, भदौ ४ । वि.सं २०७२ सालमा गएको भुकम्पका कारण भएको क्षतिले अझैसम्म पनि पूर्णता पाउन सकेको छैन । भूकम्प गएको तीन बर्ष बितिसक्दा पनि क्षतिग्रस्त सबै घर निर्माण हुन नसकेको हो ।
राष्ट्रिय पुनःनिर्माण प्राधिकरणका सचिव अर्जुनकुमार कार्कीले तोकिएको पाँच वर्षभित्र निर्माणको काम सम्पन्न हुने बताएका छन् । ट्रान्सपेरेन्सी इन्टरनेशनलको २३ औं वार्षिक उत्सवको अवसरमा भूकम्पपछिको पुनःनिर्माण पुनःस्थापनासम्बन्धी आइतबार आयोजना गरिएको विचार गोष्ठीमा बोल्दै उनले आव २०७५/०७६ लाई पुनःनिर्माण वर्षका रुपमा अभियान सञ्चालन गर्ने र आव २०७६/०७७ मा सबै घर निर्माण गर्ने कार्य पूरा हुने बताए ।
भूकम्पपीडितले मापदण्ड पूरा गरेर मात्र घर बनाउनुपर्नेमा उनको जोड छ । कार्यक्रममा राजपाका नेता महेन्द्रराय यादवले भूकम्पपीडितलाई आएको विदेशी सहायता पीडितसम्म नपुगेको, राष्ट्रिय प्राधिकरणको काम कछुवा गतिमा अघि बढिरहेको, जनता बाढी, पहिरोको जोखिममा बाँच्न बाध्य भएको बताए ।
सांसद आशाकुमारी विकले भूकम्पपीडितले धेरै दुःख पाइसकेकाले उनीहरुको घर समयमै निर्माण गर्नेतर्फ सरकारको ध्यान जानुपर्नेमा जोड दिए । ट्रान्सपरेन्सी इन्टरनेशनलका महासचिव पद्मिनी प्रधानाङ्गले भूकम्पबाट क्षतिग्रस्त भवन तथा विद्यालय अझै पुनःनिर्माण हुन नसकेको, भूकम्पपीडितको घर निर्माणको का सुस्त गतिमा अगाडि बढेको उल्लेख गरे ।
ट्रान्सपरेन्सी इन्टरनेशनलका अध्यक्ष श्रीहरि अर्यालले भूकम्पपछिको पुनःनिर्माण र पुनःस्थापनाका लागि सदाचार कार्यक्रम सञ्चालन गर्दै आएको र नीति निर्माण, योजना कार्यान्वयन र अनुगमनमा सहकार्य गर्दै आएको जनाए । कार्यक्रममा २७ प्रतिशत लाभग्राहीले मात्र घर निर्माणको काम सकेको जनाइएको छ ।
चौध जिल्लामा आठ लाख ०७ हजार ४८६ लाभग्राही रहेको, सात लाख २२ हजार १७६ सँग अनुदान सम्झौता भएको, पाँच लाख ४१ हजार ४४० घर निर्माण शुरु गरेको, तीन हजार ८१५ विद्यालय निर्माण सम्पन्न भएको जानकारी गराइयो ।
