काठमाडौँ, असार २३ । जनशक्ति विकास छात्रवृत्ति परियोजनाका लागि जापान सरकारले नेपाल सरकारलाई रु २५ करोड ७० लाख अनुदान सहयोग उपलब्ध गराउने भएको छ । यो परियोजना अन्तर्गत जापानमा स्नातकोत्तर तह अध्ययनका लागि २० सरकारी अधिकृत छनोट गरिनेछ ।
जापानका विभिन्न विश्वविद्यालयमा स्नातकोत्तर तह अध्ययनका लागि छात्रवृत्ति उपलब्ध गराई नेपाली अधिकारीको दक्षता अभिवृद्धि गर्ने उद्देश्यले यो परियोजनाको अगाडि सारिएको हो । पाँच वर्ष लामो यो परियोजना अन्तर्गत आर्थिक नीति, अन्तर्राष्ट्रिय सम्मेलन, औद्योगिक विकास नीति र कानुनी तथा न्यायिक पद्धति जस्ता समाज विज्ञानका विषयका शोधार्थीलाई छात्रवृत्ति उपलब्ध गराइने छ ।
यससम्बन्धी सम्झौतापत्रमा जापान सरकारका तर्फबाट नेपालका लागि जापानी राजदूत मासाशी ओगावा र नेपाल सरकारको तर्फबाट अर्थसचिव शान्तराज सुवेदीले अर्थमन्त्रालयमा हस्ताक्षर गरेका छन् ।
