काठमाडौँ, भदौ ६ । काठमाडौँ महानगरपालिकाले चालू आर्थिक वर्षमा नयाँ सात स्थानमा वडा कार्यालय भवन बनाउने तयारी गरेको छ । यसअघि भाडामा दिई काम हुँदै आएका वडा नं ३, ४, ९, १२, १४ र २९ मा नयाँ भवन बनाउन लागिएको कामपा, भौतिक पूर्वाधार महाशाखाका प्रमुख इञ्जिनीयर रामबहादुर थापाले बताएका छन् ।
तीमध्ये वडा नंं ३ र ४ का लागि बोलपत्र आह्वान भइसकेको छ भने सोमध्ये वडा नं ३ को भने सम्झौतासमेत भएको छ । चालू आर्थिक बर्षभित्रै सम्पन्न गर्ने गरी कामपाले सात वडामा नयाँ भवन बनाउने तथा तीन वडाको तला थप गर्ने काम अगाडि बढाएको छ ।
त्यसैगरी वडा नम्बर नं ६, ७ र १५ मा तला थप गर्ने निर्णय अनुसार काम भइरहेको छ । आफ्नो भवनको अभावमा काम गर्न समस्या भएपछि वडाको खाली जग्गामा भवन बनाउन लागिएको हो । कूल ३२ वडा रहेको कामपामा हालसम्म वडा नं ३, ६ र २९ मा रहेको सार्वजनिक जग्गाको पहिचान भइसकेको छ ।
वडा नं ३ मा १५ रोपनी, ६ मा १० रोपनी र २९ मा ९ रोपनी सार्वजनिक जग्गाको पहिचान भएको छ । कामपाले चालू आव २०७५÷७६ का लागि रु १३ अर्ब दुई करोड १२ लाख ३७ हजारको बजेट प्रस्तुत गरेको थियो । सो अन्तर्गत भौतिक पूर्वाधार निर्माण गर्न चालू आवमा रु चार अर्ब छ करोड बजेट विनियोजन गरिएको छ ।
महानगरभित्रका सडक विस्तार र मर्मतमा सबैभन्दा बढी खर्च गरिने छ । चालू आवमा पैदलयात्रुको अत्यधिक चाप बढेकाले आठ स्थानमा स्थानान्तरण गर्न सकिने नयाँ आकाशेपुल कामपाले बनाउने भएको छ ।
