काठमाडौँ, भदौ ७ । आज बसेको प्रतिनिधिसभाको बैठकको विशेष समयमा भाग लिने सांसदहरुले कञ्चनपुरमा भएको बलात्कारको घटना, स्थानीय तहमा भएको भनिएको करवृद्धिलगायत मुलुकका समसामयिक विषयमा सरकारको ध्यानाकर्षण गराएका छन् ।
प्रमुख प्रतिपक्ष दल नेपाली कांग्रेसकी सांसद सुजाता कोइरालाले मुलुकलाई विकास र समृद्धिको मार्गमा लगेमा प्रतिपक्षले पूर्ण रुपमा सहयोग र समर्थन गर्ने प्रतिबद्धता जनाइरहेको बेला जनतालाई मार पर्ने ढङ्गबाट कर बढाएको भनी सरकारको आलोचना गरिन् । अहिले स्थानीयस्तरबाट जथाभावी कर लगाउनाले आम जनता मारमा परिरहेका परिरहेकाले यस विषयमा सरकारले विशेष ध्यान दिन आवश्यक रहेको उनको भनाइ छ ।
नेकपा (नेकपा)का सांसद सूर्य पाठकले वर्तमान सरकारले उचित वैदेशिक नीति, संघीयता कार्यान्वयन र सुशासन स्थापनाका लागि सराहनीय काम गरिरहेको विचार व्यक्त गरेकी छिन् ।
चीन र भारतसँग पनि समानताका आधारमा वैदेशिक नीति स्थापित गराएको भन्दै उनले वर्तमान सरकार गठनपछि नेपालले चीन र भारतबीच सन्तुलित सम्बन्ध राख्ने गरी बढाएको नीतिको चौतर्फी रुपमा स्वागत भएको छ, स्थानीय तहले लिएको करबारे प्रतिपक्षले अनावश्यकरुपमा हल्ला मचाउने मात्र काम गरेको छ– उनले भने ।
सांसद दीपकप्रकाश भट्टले कञ्चनपुरमा भएको बलात्कारमा संलग्न दोषीलाई छानबिनका आधारमा दोषी ठहर्याउनुपर्नेमा आन्दोलनको भरमा दोषी खडा गर्ने प्रयास भइरहेकोतर्फ सदनको ध्यानाकर्षण गराए ।
सांसद मोहन आचार्यले रसुवाको विभिन्न स्थानमा गएको बाढीपहिरोबाट भएको जनधनको क्षतिबारे सदनमा जानकारी गराउँदै पीडितलाई राहतको व्यवस्था गर्नुपर्ने माग गरे । सांसद अमृता अग्रहरिले सरकारले मधेश र मधेशीप्रति विभेद गरेको भन्दै जनताबाट निर्वाचित भएका रेशम चौधरीलाई कुन ऐनका आधारमा प्रमाणपत्र नदिएको हो भनी प्रश्न गरे ।
सांसद सरिता गिरीले धनुषा जिल्लाको ढल्केवरदेखि सुनसरीको इटहरीसम्म विद्युत् प्रसारण लाइन विस्तार गर्दा लहान नगरपालिकास्थित कडरिया गाउँमा अहिले विवाद उत्पन्न हुँदा काम अगाडि बढ्न नसकेकोप्रति सरकारको ध्यानाकर्षण गराए । उनले विद्युत् पोल गाड्दा पहाडी भेगको छेउछाउबाट लैजानुपर्ने भन्ने व्यवस्था गर्न माग गरेका छन् ।
