कायरो, भदौ १७ । सामाजिक सञ्जाललाई नियन्त्रण गर्ने कानुनलाई इजिप्टका राष्ट्रपति अब्देल फताह अल सीसीले अनुमोदन गरेका छन् ।
नयाँ कानुनमा सरकारी अधिकारीहरुलाई सामाजिक सञ्जाल प्रयोगकर्ताहरुको निगरानी गर्न अधिकार दिइएको छ । संसदबाट गत जुलाईमा पारित भएको कानुनमा सञ्चार माध्यम नियमनका लागि सर्वोच्च परिषद्लाई कामको जिम्मा लगाएको छ ।
सामाजिक सञ्जाल, व्यक्तिगत ब्लग, वेभसाईटलगायतमा ५,००० भन्दा बढी फलोअर भएका व्यक्तिको अनुगमन गरिने प्रावधान कानुनमा रहेको छ । गलत समाचार प्रकाशन वा प्रशारण गरेमा वा कानुनको मिची हिंसा वा द्वेष फैल्याउन सूचना प्रवाह गरेमा व्यक्तिगत एकाउन्ट निलम्बन वा बन्द गर्ने जिम्मा अख्तियारी परिषदलाई दिइएको छ ।
सञ्चार सम्बन्धी विज्ञ तथा अधिकारकर्मीहरुले भने यस कानुनले राष्ट्रपतिको शासनका बारेमा अनलाइनमार्फत आलोचना गर्न पाउने हरेक व्यक्तिको वाक् स्वतन्त्रतामा धावा बोल्ने वा व्यवधान उत्पन्न गर्ने टिप्पणी गरेका छन् । सीसीले जारी गरेको कानुनसँगै इन्टरनेटको प्रयोग र यसको व्यवस्थापनका बारेमा सार्वजनिक रुपमा थप बहस हुन थालेको छ ।
सिलसिलाबद्ध रुपमा यस्ता नियन्त्रणमुखी कानुनहरु आइरहेको विज्ञ तथा अधिकारकर्मीहरुले बताएका छन् । यही अगस्टमा राष्ट्रपति सीसीले यस्तै अर्को कानुन पनि जारी गरेका थिए ।
उक्त कानुनमा इजिप्टको राष्ट्रिय सुरक्षा र अर्थतन्त्रलाई असर गरेमा अदालतले वेभसाइट बन्द गर्न आदेश दिन सक्ने प्रावधान गरिएको थियो ।
अधिकारप्राप्त व्यक्ति तथा प्रशासकहरुले वेभसाइट तथा सामाजिक सञ्जालहरुको गलत प्रयोग गर्नेलाई कारावास सजाय तथा दण्ड जरीवाना गर्न सक्ने बताइएको छ ।
इजिप्टमा अहिले ५०० भन्दा बढी वेभसाइटहरु बन्द गरिएको छ भने नयाँ कानुन आएपछि अरु पनि धेरै अनलाइन, वेभसाइट तथा व्यक्तिगत ब्लगहरु बन्द हुने अनुमान गरिएको छ ।
रासस/एएफपी
