लागूऔषध बोकेर हिँडेको अवस्थामा यादव पक्राउ

काठमाडौँ, भदौ २४ । ९०० एम्पुल लागूऔषधसहित महानगरीय प्रहरी परिसर काठमाडौँले एक जनालाई पक्राउ गरेको छ ।

झोलामा लागूऔषध बोकेर हिँडिरहेको अवस्थामा पर्सा वीरगञ्जका १९ वर्षीय सुवास यादवलाई परिसर अन्तर्गतको महानगरीय प्रहरी वृत्त कालिमाटीले आज बिहान ११ बजे बल्खु सडकबाट पक्राउ गरेको हो ।

पक्राउ यादवसँग प्रहरीले ३०० एम्पुल डाइजोपाम, ३०० एम्पुल नुर्फिन र ३०० एम्पुल फेनार्गन बरामद गरेको छ । महानगरीय प्रहरी परिसर काठमाडौँका प्रवक्ता एवं प्रहरी उपरीक्षक रामदत्त जोशीले बल्खु इलाकाबाट लागूऔषध कारोबार भइरहेको विशेष सूचनाको आधारमा यादवलाई पक्राउ गरिएको जनाएका छन् ।

यस विषयमा आवश्यक अनुसन्धान भइरहेको परिसरले बताएको छ ।