काठमाडौँ, २८ । नेपालको शान्ति प्रक्रिया विश्वकै लागि नयाँ नमूना भएको नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले बताएका छन् ।
नेपालको शान्ति प्रक्रिया ‘मोडल’ बारे अध्ययन गर्न काठमाडौँ आएको अफगानिस्तानको उच्च शान्ति परिषद्को प्रतिनिधिमण्डलसँगको आजको भेटमा उनले नेपालले शान्ति प्रक्रिया सम्पन्न गरेर विश्वलाई सकारात्मक सन्देश प्रदान गरेको प्रस्ट पारे ।
नेपालको शान्ति प्रक्रियाबाट जनताले गणतन्त्र, संघीयता, धर्मनिरपेक्षता, समानुपातिक, समावेशीजस्ता उपलब्धि प्राप्त गरेको अध्यक्ष दाहालको भनाइ छ । नेपाली जनताको राजनीतिक स्वतन्त्रताको आन्दोलन भएकाले जनयुद्धमा धेरै ठूलो जनताको सहभागिता भएको उनले बताए ।
उनले भने– हामीले जनताको अधिकारको निम्ति भएको युद्धको नेतृत्व ग¥यौँ र धेरै हदसम्म जनताका अधिकार स्थापित गराउन सफल भयौँ । भेटका क्रममा उच्च शान्ति परिषद्की उपप्रमुख एवं पूर्वमन्त्री डा हबिबा साराबीले अफगानिस्तानमा शान्ति प्रक्रिया अघि बढेको जनाउँदै नेपालको शान्ति प्रक्रियाबाट सिक्न आफूहरु नेपाल भ्रमणमा आएको जनाए ।
उनले नेपालको शान्ति प्रक्रिया विश्वकै लागि उदाहरणीय भएको बताउँदै त्यसबाट सिक्न आफूहरु इच्छुक रहेकोसमेत बताए ।
उक्त अवसरमा भ्रमण दलका सदस्यले नेपालमा सशस्त्र द्वन्द्वको क्रममा हतियारको स्रोत, पूर्वजनमुक्ति सेनासँग भएको हतियारको अवस्था र व्यवस्थापन तथा शान्ति प्रक्रियाका कामलाई सहयोग गर्न स्थापना भएको शान्ति तथा पुनःनिर्माण मन्त्रालयको काम कारवाहीबारे पनि जिज्ञासा व्यक्त गरेका थिए ।
टोलीले शान्ति प्रक्रियामा नेपालले अवलम्बन गरेको नीतिका बारेमासमेत छलफल गरेको अध्यक्ष दाहालको सचिवालयले बताएको छ ।
