काठमाडौँ, भदौ २९ । भारतको आगरामा आगामी असोज ४ देखि १४ गतेससम्म हुने ४६औँ एशियन स्कुल फुटबल (यु–१८) च्याम्पियनसीपको खेल तालिका आज सार्वजनिक गरिएको छ ।
सो प्रतियोगितामा आठ राष्ट्रले सहभागीता जनाउने छन् । प्रतियोगितामा नेपाल समूह ‘ए’ मा परेको छ । नेपाल रहेको समूहमा इण्डोनेसिया, चीन र थाइल्याण्ड तथा समूह ‘बी’ मा दक्षिण कोरिया, मलेसिया, श्रीलङ्का र भारत छन् ।
पहिलो खेलमा नेपालले असोज ६ गते थाइल्याण्डसँग खेल्नेछ भने दोस्रो खेल असोज ८ गते इण्डोनेसियासँग तथा ९ गते चीनसँग खेल्नेछ । दुवै समूहको शीर्ष दुई टोली सेमिफाइनल पुग्नेछन् ।
सो प्रतियोगिताका लागि यसअघि नै अखिल नेपाल फुटबल संघ (एन्फा)ले नेपाली टोलीको घोषणा गरिसकेको छ । नेपाली टोलीको प्रशिक्षकमा चेतनारायण श्रेष्ठ र गोलकिपर प्रशिक्षकमा चक्र तामाङ रहेका छन् ।
नेपाली टोलीमा विष्णुकुमार केसी, विशाल सुनार, सूर्य अधिकारी, विकास खवास, नवीन गुरुङ, राजेश गुरुङ, असिम गुरुङ, रणदिप पौड्याल, सञ्चित राई, नितिन थापा, मनिस थापा, जय गुरुङ, सुरज ठकुरी, अनिल महर्जन, दिनेश हेञ्जन (कप्तान), बुद्ध बल तामाङ, रितिक खड्का, अनुरु गुरुङ र टीका गुरुङ रहेका छन् ।
वैकल्पिक खेलाडीमा विवेक राई, आकाश रानाभाट, पवन शाही र दर्शन गुरुङ छन् ।
