काठमाडौँं, असार २७ । असार १४ गते भएको प्रदेश नं १, ५ र ७ का ३५ जिल्लाका दोस्रो चरणको ३३४ स्थानीय तहको निर्वाचनको अन्तिम मत परिणाम घोषणा भइसकेको छ ।
अन्तिम मत परिणामसम्म हेर्दा नेकपा(एमाले) १५१, नेपाली काँग्रेस १२२, नेकपा (माओवादी केन्द्र) ३८, संघीय समाजवादी फोरम नेपाल आठ, नेपाल लोकतान्त्रिक फोरम छ, राप्रपा चार र राष्ट्रिय जनमोर्चाका दुई उम्मेदवार प्रमुखमा विजयी बनेको निर्वाचन आयोगले जानकारी गराएको छ । निर्वाचनमा स्वतन्त्र तीन उम्मेदवार पनि प्रमुखमा विजयी भएका छन् ।
दोस्रो चरणको निर्वाचनको हालसम्म घोषित स्थानीय तहको परिणाममध्ये प्रमुखमा एमालेले ४५.२ प्रतिशत, काँग्रेसले ३६.५ र माओवादी केन्द्रले ११.४ प्रतिशत पद हासिल गरेका छन् भने उपप्रमुखमा एमाले १७५, काँग्रेस १०४, माओवादी केन्द्र ३८, समाजवादी फोरम सात, लोकतान्त्रिक फोरम छ तथा जनमोर्चा र राप्रपाका दुई दुई उम्मेदवार विजयी भएको आयोगका प्रवक्ता सूर्यप्रसाद शर्माले जनाए । दोस्रो चरणका ३३४ स्थानीय तहबाट १५ हजार ३८ जनप्रतिनिधिको चयन भएको छ । सो निर्वाचनमा ४७ लाख ४० हजार ५२२ मत खसेको थियो ।
