काठमाडौं, असोज ७ । दसैंको मुखैमा आएर सार्वजनिक यातायातको भाडा बढाएर सरकारले जनतालाई महङ्गीको मारमा पार्ने काम गरेको भन्दै नेपाल विद्यार्थी संघले तत्काल मूल्यवृद्धि फिर्ता लिनुपर्ने माग गरेको छ ।
दसैंको मुखमा सिन्डिकेटलाई प्रोत्सहान गर्ने गरी सरकारले भाडा बढाएको भन्दै नेविसंघले तत्काल मुल्यवृद्धि फिर्ता नलिए आफुहरुले सशक्त आन्दोलन गर्ने चेतावनी दिएको छ ।
‘वर्तमान सरकारले चाडवाडको मुखमा आएर महंगी बढाउँदै जनतालाई निरास पार्ने गरी बढाएको १० प्रतिशत भाडा तत्काल फिर्ता लिन नेविसंघले माग रहेको नेपाल विद्यार्थी संघका महामन्त्री कुन्दन काफ्लेले बताएका छन् ।
विगतमा सिन्डिकेट तोडे भनेर ध्वास दिएको सरकारले नै सिन्डिकेट व्युताउने गरी व्यवसायीको हितमा भाडा बढाइएको उनले आरोप लगाएका छन् । सरकारले यातायात व्यवसायीहरूले दशैंको अग्रिम टिकट बुकिङ नै रोकेपछि शनिवार राती १० प्रतिशत भाडा बढाउने सहमति गरेको हो ।
हालै मात्र इन्धनको मूल्य बृद्धि भएपछि व्यवसायीले ५ गतेबाट खुला गर्ने भनिएको अग्रिम टिकट बुकिङ रोकेका थिए । इन्धिनको मूल्य फिर्ता लिनुको सट्टा भाडा बढाउनुले ओली सरकार जनता माझमा चुकेकोसमेत आरोप महामन्त्री काफ्लेले लगाए ।
‘यो भाडा बृद्धि तत्काल फिर्ता नभएर देशभर नेविसंघ आन्दोलित हुने र फिर्ता गर्न बाध्य बनाउने काफ्लेको भनाइ छ ।
