काठमाडौँ, असोज ८ । जापान सरकारले त्रिविवि शिक्षण अस्पताललाई चिकित्सकीय उपकरण सहयोग गरेको छ ।
जापान अन्तराष्ट्रिय सहयोग नियोग (जाइका) ले तेस्रो चरणको सहयोग कार्यक्रम अन्तर्गत करीब रु एक अर्ब बराबरको भौतिक एवं चिकित्सकीय उपकरण अस्पताललाई उपलब्ध गराएको हो ।
आज आयोजित एक कार्यक्रममा डिजिटल मनोग्राफ, सिएम एक्सरे मेसिन, भेन्टिलेटर, प्याटिएण्ट मनिटर, एनेथेसिया मसिन, भिडियो अर्थस्कोपी सेटलगायतका सामग्री उपलब्ध गराएका छन् ।
शिक्षा, विज्ञान तथा प्रविधिमन्त्री गिरिराजमणि पोखरेललाई नेपालका लागि जापानका राजदूत मासामिसी साइगो र जाइकाका नेपाल प्रतिनिधि जुन साकुमाले ती सामग्री हस्तान्तरण गरे ।
जाइकाले त्रिविवि शिक्षण अस्पतालको भौतिक पूर्वाधार एवं उपकरणका लागि सन् १९८३ मा सर्वप्रथम र सन् १९९२ मा दोस्रो पटक सहयोग प्रदान गरेको थियो । करीब सात सय श्ययाको उक्त अस्पतालमा चिकित्सा विधाका सबै तहका अध्ययन एवं अध्यापन हुने गर्दछ ।
शिक्षण अस्पतालमा सबै भौतिक संरचना जापानी नमूनामा बनेका छन् । सन् २०१५ को विनाशकारी भूकम्पले अस्पतालको भौतिक संरचनामा क्षति पुर्याएको थिएन । कार्यक्रममा बोल्दै मन्त्री पोखरेलले नेपालको शिक्षा र स्वास्थ्य सेवा सुधारमा जापान सरकारको सहयोग महत्वपूर्ण रहेको जनाए ।
जापानी राजदूत साइगोले नेपालको आर्थिक एवं सामाजिक विकासमा आगामी दिनमा जापान सरकारले निरन्तर सहयोग जारी राख्ने जनाए ।
त्रिविविका उपकुलपति प्रा डा तीर्थराज खनिया, चिकित्सा अध्ययन सस्थानका डिन प्रा डा जगदीश अग्रवाल, अस्पतालका पूर्व कार्यकारी निर्देशक प्रा डा दीपकप्रकाश महराले शिक्षण अस्पतालको विकासमा जापान सरकारले गरेको सहयोगप्रति धन्यवाद व्यक्त गरे ।
