काठमाडौँ, असोज ८ । नागरिकता ऐन संशोधन गर्दा राष्ट्रिय हितलाई ध्यानमा राखि गरिनुपर्ने पूर्वप्रधानमन्त्री तथा नेपाल कम्युनिष्ट पार्टी (नेकपा) का नेता झलनाथ खनालले बताएका छन् ।
नागरिकता संशोधन विधेयकविरुद्ध आन्दोलन समन्वय समितिद्वारा आज आयोजिना विचार गोष्ठीमा बोल्दै उनले राष्ट्रिय हितलाई ध्यानमा राखेर ऐन संशोधन गरिनुपर्नेमा जोड दिएका हुन् ।
कुनै पनि नेपाली नागरिकता पाउनबाट वञ्चित हुन नहुने र कुनै विदेशीले नेपाली नागरिकता पाउनु हुँदैन भन्ने संविधानको मूल मर्म रहेकाले सोहीअनुरुप ऐन संशोधन हुनुपर्ने पूर्वप्रधानमन्त्री खनालको भनाइ छ ।
उनले नागरिकता सम्बन्धी ऐन बनाउँदा संविधानको मर्मअनुरुप गहन अध्ययन गरेर सजग र सचेतपूर्ण तरिकाले बनाउनुपर्ने बताएका छन् ।
नेकपा (माले) का महासचिव सिपी मैनालीले नागरिकता सम्बन्धी ऐन संशोधन गर्दा ध्यान नदिएमा देशको राष्ट्रियता, स्वतन्त्रता र सार्वभौमसत्तालाई गम्भीर असर पर्न जाने विचार प्रस्तुत गरे ।
सरकारले नागरिकता ऐन, २०६३ लाई संशोधन गर्नका लागि संसद्मा विधेयक पेश गरेको छ । नेपाल–भारतबीच खुला सिमाना भएकाले भारतीय नागरिक मात्र नभई अन्य देशका नागरिक पनि नेपालभित्र आई बसोबास गरिरहेकाले तिनीहरुलाई नागरिकता दिँदा ध्यान दिनुपर्नेमा समितिले जोड दिएको छ ।
समितिले कामका सिलसिलामा नेपाल आएका व्यक्तिलाई कार्य अनुमतिपत्र लिनुपर्ने व्यवस्था लागू गर्न पहल गर्नुपर्ने माग गरेको छ । कार्यअनुमतिपत्र लिएर काम गर्दा गैरकानूनी रुपमा नेपालमा प्रवेश गर्नेलाई रोक्न सकिने जानकारी गराइएको छ ।
