कम्युनिष्टहरुमा पलाएको दुई तिहाईको दम्भले मुलुक दुर्घटनाको संघारमा पुगेको नेपाली कांग्रेसका नेता डा शेखर कोइरालाले बताएका छन् ।
कोइरालाले राज्यका सबै निकायमा कम्युनिष्टहरूले कब्जा जमाएर अराजकता मच्चाएको बताए । डा कोइरालाले नेपाली सेना मात्रै राजनीतिक हस्तक्षेप हुनबाट बचेको बताउँदै सेनामाथी राजनीति नगर्न सरकारलाई चेतावनी दिएका छन् । उनले यो सरकार भ्रष्टाचारको अखडा बनेको बताएका छन् ।
गण्डक–टोखा प्रजातान्त्रिक समाज नेपालले राजधानीमा आयोजना गरेको शुभकामना आदान–प्रदान कार्यक्रमलाई संबोधन गर्दै डा कोइरालाले निर्मला पन्तको मुद्दामा प्रहरी प्रशासन निरिह बनेको बताए ।
संगठनका बारेमा कुरा गर्दै डा कोइरालाले पार्टीलाई संकट र अप्ठ्यारो परेको समयमा पार्टीका बिरुद्ध लाग्ने जुनसुकै तहका भएपनी त्यस्ता ब्यक्तिलाई पार्टीबाट निष्काशन गर्नुपर्ने धारणा व्यक्त गरे ।
कार्यक्रममा सांसद भिमसेनदास प्रधान, पुर्व सांसदहरु– डा शोभाकर पराजुली, डा रामचन्द्र अधिकारी, रामबहादुर गुरुङ लगायतले आ– आफ्नो विचार व्यक्ति गरेका थिए ।
“गण्डक–टोखा समाज’’ गण्डकी अञ्चलबाट काठमाडौको टोखामा आएर बसोबास गर्ने र प्रजातन्त्रमा आस्था राख्ने ब्यक्तिहरुको संस्था हो ।
