काठमाडौँ, असोज २४ । मलेसियाको राजधानी क्वालालम्पुरस्थित वायुमस ओभल क्रिकेट मैदानमा भएको आइसिसी विश्व टी–२० एशिया छनोट समूह ‘बी’ अन्तर्गत नेपालले लगातार पाँचौँ जित हात पारेको छ ।
आज भएको खेलमा नेपालले चीनलाई १० विकेटले पराजित गर्दै लगातार पाँचाँै जित हात पार्न सफल भएको हो । टस हारेर पहिले ब्याटिङ गरेको चीनले १३ ओभरमा पूरै विकेट गुमाउँदै २६ रन मात्र बनायो । चीनका होङ जियाङ यानले ११ रनबाहेक अन्य ब्याट्सम्यानले दोहोरो अङ्कको रन बनाउन सकेनन् ।
चीनका सातजना ब्याट्सम्यान शून्य रनमै आउट भए । चीनलाई २६ रनमै सीमित गर्ने क्रममा नेपालका सन्दीप लामिछाने, वसन्त रेग्मी र ललित राजवंशीले तीन/तीन विकेट लिए ।
चीनले दिएको २७ रनको लक्ष्य नेपालले ११ बलमै बिनाविकेटको क्षतिमा पूरा गर्यो । नेपालको जितमा ओपनर विनोद भण्डारीले अविजित २४ र प्रदीप ऐरीले पनि अविजित चार रन बनाए ।
चीनलाई १० विकेटले हराएर नेपालले अपराजित यात्रा कायम राखेको हो । एशिया छनोटको दोस्रो चरणमा पुगिसकेको नेपालले शुक्रबार अन्तिम खेलमा सिङ्गापुरसँग खेल्नेछ ।
जितसँगै छनोटमा नेपाल पाँच खेलबाट १० अङ्क जोडेर शीर्ष स्थानमा छ । चीन भने पाँच खेलमै पराजित हुँदा तालिकामा अङ्कविहीन बन्न पुगेको छ ।
