काठमाडौं, असोज २५ । प्रहरीको भूमिका समाजमा पृथक र उदाहरणीय हुनुपर्ने प्रधानमन्त्री केपी शर्मा ओलीले आवश्यकता औल्याएका छन् ।
६३ औं प्रहरी दिवसको अवसरमा आयोजित कार्यक्रममा बोल्दै उनले समाजमा प्रहरीको जिम्मेवारी अरुको भन्दा बढी र फरक खालको हुने भएकाले प्रहरीले सर्वसाधारणको मन जित्ने गरी काम गर्नुपर्ने बताए । प्रहरीले ९० प्रतिशत अपराध पत्ता लगाउन सफल भए पनि केही मुद्धामा असफल भएमा यसलाई भरपुर गर्न सजिलो नभएको उनको भनाइ छ ।
समृद्धिको पहिलो आधार शान्ति सुरक्षा भएकाले प्रहरी यसमा उत्तरदायी बन्नुपर्नेमा प्रधानमन्त्री ओलीको जोड छ । उनले भने– हामी राजनीतिक उथलपुथलबाट नयाँ चरणमा छौँ, सुखी नेपाली समृद्ध नेपालको अभियानमा गएका छौँ, यसलाई कायम राख्नको लागि प्रहरीको ठूलो उत्तरदायित्व छ ।
नेपाल प्रहरी पहरेदारको रुपमा स्थापित भएको र सशस्त्र दन्द्धको समयमा मुलुक गुज्रँदा सीमित स्रोतबाट प्रहरीले देशप्रेम वीरता दर्शाएको प्रधानमन्त्री ओलीले प्रशंसा गरे ।
मुलुक संघीयतामा गइसकेकाले स्थानीय तहको चुनाव शान्तिपूर्वक सम्पन्न गराउन पनि प्रहरीको ठूलो योगदान रहेकोमा खुसी व्यक्त गरे । पछिल्लो समय विज्ञान र प्रविधिको कारण प्रहरीमा चुनौती बढेकाले यसका निम्ति चनाखो हुन अनुरोध गरे ।
विज्ञान र प्रविधिको युगमा प्रविधिले निम्त्याएका अपराध नयाँ स्वरुपमा वृद्धि भएको उनको भनाइ छ । यसमा प्रतिवद्ध भएर मिसनमा लाग्न आफुले अनुरोध गर्ने उनले बताए ।
प्रहरीको जिम्मेवार धेरै र महत्वपूर्ण भएकाले प्रशासनलाई सुदृढ र शक्तिशाली संगठन बनाउन सरकारले ध्यानाकर्षण गर्ने बताए ।
