हेटौँडा, असोज २५ । प्रहरीको आचरण व्यवहारमा सुधार गरिनुपर्ने प्रदेश नं. ३ का मुख्यमन्त्री डोरमणि पौडेलले बताएका छन् ।
मुख्यमन्त्री पौडेलले ३ नं प्रदेश प्रहरी कार्यालय हेटौँडाले आज ६३औँ प्रहरी दिवसका उपलक्ष्यमा आयोजना गरेको समारोहमा बोल्दै जनताको शान्तिसुरक्षा र समाजमा बढ्दै गएको अपराध नियन्त्रणका लागि प्रहरीलाई अझै बढी जिम्मेवार बनाउनुपर्नेमा जोड दिए ।
उनले प्रहरीको प्रशासकीय क्षमता अभिवृद्धि गरी जनतालाई गुणस्तरीय सेवा प्रदान गर्न प्रदेश सरकारले आवश्यक बजेट र प्रदेश प्रहरी कानूनको तर्जुमा गर्न गृहकार्य गरिरहेको जनाएका छन् । मुख्यमन्त्री पौडेलले प्रचलित ऐन कानून बमोजिम प्रहरी जनशक्तिले अनुसन्धान गरी कारवाही प्रक्रिया अगाडि बढाउन अनुरोध गरे ।
आन्तरिक मामिला तथा कानूनमन्त्री शालिकराम जम्कट्टेलले प्रहरीले जनतालाई शान्तिसुरक्षा प्रदान गर्न, विपतमा उद्धार कार्यमा तीव्रता ल्याउन, प्रहरीको क्षमता अभिवृद्धि गर्न र अपराधलाई वैज्ञानिक प्रवृत्तिबाट अनुसन्धान गरेर कानूनी कारवाहीको दायराभित्र ल्याउनका लािग प्रदेश सरकारले प्रभावकारी कार्यक्रम ल्याउन लागेको जनाए ।
उनले प्रहरी र नागरिकबीच सहकार्य गरी एक आपसमा विश्वासको वातावरण तयार गर्न आवश्यक रहेको बताउँदै प्रहरीले कुनै दल वा समूहको प्रभावमा नपरी आफ्नो जिम्मेवारीलाई निष्पक्ष र जनमुखी ढंगले निर्वाह गर्नुपर्नेमा जोड ।
उक्त अवसरमा ३ नं प्रदेश प्रहरी कार्यालयका प्रहरी नायब महानिरीक्षक दीपक थापाले प्रहरी जनशक्तिलाई समय अनूकल सुधार गरी प्रदेशस्तरमा जनताको शान्तिसुरक्षा, मानवअधिकारको संवद्र्धन गर्ने र अपराध नियन्त्रण गर्न सक्षम रहेको बताए ।
