काठमाडौँ, असोज २५ । यौनजन्य अश्लील सामग्री राख्ने २१ हजारभन्दा बढी वेबसाइटलाई सरकारले बन्द गरेको छ ।
बलात्कार तथा यौनजन्य हिंसाका घटनालाई न्यूनिकरणको उद्देश्यले सरकारले अश्लील सामग्री राख्ने वेबसाइट बन्द गर्ने निणर्य गरेको हो ।
सञ्चार तथा सूचना प्रविधि मन्त्रालयले यही असोज ७ गते दूरसञ्चार सेवा प्रदायक, इन्टरनेट सेवा प्रदायक र सामाजिक सञ्जाल सञ्चालकमार्फत प्रकाशन तथा प्रसारण गर्ने त्यस्ता वेबसाइटलाई तत्काल बन्द गर्न नेपाल दूरसञ्चार प्राधिकरणलाई निर्देशन दिएको थियो ।
सो निर्देशन अनुसार प्राधिकरणले ८ गतेदेखि काम थालेको हो । नेपालमा अहिले करीब सयभन्दा बढी इन्टरनेट सेवा प्रदायक कम्पनीहरु संचालित छन् । अहिलेसम्म २१ हजारभन्दा बढी वेबसाइट बन्द भइसकेको प्राधिकरणले जनाएको छ ।
त्यस्ता प्रकृतिका अन्य वेबसाइट पनि बन्द गर्न निर्देशन दिइसकिएको छ । नेपाल टेलिकम र एनसेलबाट सञ्चालन हुने नेटवर्कबाट त्यस्ता खालका साइट पनि बन्द गरिसकिएको नेपाल दूरसञ्चार प्राधिकरण, अनुगमन विभागका निर्देशक विजयकुमार रायले बताए ।
नेपालमा अश्लील यौनजन्य सामग्री प्रकाशन प्रसारण गर्ने खालका एक लाखभन्दा बढी वेबसाइटहरु रहेका छन् । अश्लील वेबसाइटलाई पूर्ण रुपमा बन्द गर्नका लागि कुनै पनि व्यक्तिले अश्लील साइट हेरेको खण्डमा त्यसलाई एप्समा हालेर तत्कालै बन्द गर्न सकिने प्रविधि निर्माण गर्ने तयारीमा प्राधिकरण जुटेको छ ।
मुलुकी अपराध (संहिता) ऐन, २०७४ को दफा १२१ मा शारीरिक कामोत्तेजना बढाउने वा काम वासनामा आशक्त गराउने वा चरित्रहीन बनाउने कुनै अश्लील किताब, पर्चा, रेखाचित्र, चलचित्र, तस्वीर, रेकर्ड वा अरू कुनै वस्तु बनाउन, मुद्रण गर्न वा प्रकाशित गर्न वा विद्युतीय सञ्चारमाध्यमबाट प्रचार प्रसार गर्न नपाइने उल्लेख छ ।
