रोल्पा, असोज २६ । पछिल्लो समय नेपालमा बेरोजगारीको समस्या दिनानुदिन बढ्दै जान थालेको छ । विदेश गएर केही पैसा कमाएर आफ्ना परिवारको इच्छा पुर्ति गर्ने उद्देश्यले देशका युवाशक्ति विदेशिने गरेका हुन् ।
यसरी गाउँका युवा जनशक्ति विदेशिने क्रम बढ्न थालेपछि रोल्पाका स्थानीय सरकारले गाउँमै रोजगारीको अवसर सिर्जना गर्ने भन्दै युवा स्वरोजगार कार्यक्रमको शुरुवात गरेका छन् ।
गाउँका युवाशक्ति विदेशिएकाले गाउँ युवाबिहीन हँुदा त्यहाँको विकास गतिविधिमा असर देखिन थालेपछि स्थानीयस्तरमै यस्तो कार्यक्रमको शुरुवात गरेको स्थानीय सरकारहरुले बताएका छन् ।
व्यावसायिक कृषि तथा पशुपालनमार्फत गाउँघरमै रोजगारीका अवसर सिर्जना गर्नका लागि परिवर्तन गाउँपालिकाले चालु आर्थिक वर्षका लागि रु ३० लाख बजेट विनियोजन गरेको जनाएको छ ।
विनियोजित बजेटबाट बेरोजगार युवाहरुलाई व्यावसायिक कृषि तथा पशुपालनका लागि सहयोग गरिने गाउँपालिका अध्यक्ष नीमकान्त डाँगीको भनाइ छ । विदेशिनेको संख्या बढ्दै जाँदा गाउँमा दक्ष जनशक्ति अभाव देखिएकाले उनीहरुलाई लक्षित गरी यस्तो कार्यक्रम ल्याएको अध्यक्ष डाँगीले बताए ।
रोल्पा नगरपालिकाले समेत नगरपालिका युवा स्वरोजगार कोष स्थापना गरेको छ । कोषमा चालु आर्थिक वर्ष रु ३० लाख विनियोजन गरिएको नगरपालिकाका प्रमुख प्रशासकीय अधिकृत सावित्रा पुनले जनाइन् । कोषमा हरेक वर्ष बजेट थप्दै जाने बताइएको छ ।
कोषको रकमबाट नगरपालिकाभित्रका बेरोजगार युवालाई स्वरोजगार बनाउन विभिन्न तालीम तथा अन्य सहयोग गरिने जनाइएको छ । कृषि तथा गैरकृषि क्षेत्रबाट युवालाई स्वरोजगार बनाउन कोष परिचालन गरिने बताइएको छ ।
एक घर एक रोजगारको अवधारणा अनुसार नगरपालिकाले प्राविधिक जनशक्ति उत्पादन गर्ने भन्दै हरेक वर्ष नगर क्षेत्रका एक सय विद्यार्थीलाई छात्रवृत्तीसमेत वितरण गर्दै आएको छ । कृषि, भेटनरी, स्वास्थ्य तथा इञ्जीनीयरिङ विषय अध्ययनका लागि छात्रवृत्ति वितरण गरेको नगर प्रमुख पूर्ण केसीले बताए ।
छात्रवृत्तिले हरेक घरमा कम्तीमा एक जनालाई रोजगार बनाउन सहयोग गर्ने अपेक्षा गरेका छांैँ उनले भने । देशभित्र रोजगारीको अवसर नभएको भन्दै रोल्पाबाट खाडीमूलुक जाने युवाको संख्या दिनानुदिन बढिरहेको बेला स्थानीय सरकारको यस्तो कदमले युवा जनशक्ति विदेश पलायनको समस्या कम हुने अपेक्षा गरिएको छ ।
संघीय, प्रदेश र स्थानीय सरकारबाट सडक निर्माणका लागि आउने बजेट समेत स्काभेटर प्रयोगमा खर्च गर्ने भएकाले घरदैलोमा आएको रोजगारीको अवसरबाट वञ्चित हँुदै आएका युवा बाध्य भएर वैदेशिक रोजगारीमा जाने गरेका छन् । भारतबाहेक खाडी मुलुकमा जाने रोल्पाली युवा युवतीको संख्या करीब ४५ हजार रहको बताइएको छ ।
जिल्ला प्रशासन कार्यालय रोल्पाबाट साधारण र द्रुत सेवाबाट करीब ४९ हजारले राहदानी बनाएको तथ्याङ्क छ । अदक्ष कामदारको रुपमा विदेशिने उनीहरुको पारिश्रमिक समेत निकै कम हुने गरेको छ । जोखिमपूर्ण काम गर्न बाध्य रोल्पालीमध्ये हरेक वर्ष ठूलो संख्यामा लाश बनेर फर्कने गरेका छन् ।
विदेश जानेमध्ये अधिकांश २० देखि ३० वर्ष उमेर समूहका रहेको बताइन्छ । सबैभन्दा बढी उत्पादनशील जनशक्ति मानिने यो समूहका युवाको विदेश पलायनले जिल्लाका गाउँघर युवाबिहीन हुने मात्रै हैन खेतबारी बाँझिदा भविष्यमा विकराल अवस्था सिर्जना हुनसक्ने जिल्लावासीको चिन्ता रहेको छ ।
