काठमाडौँ, कात्तिक १२ । ललितपुर जावलाखेल मैदानमा चार दिने १२ औँ गोदावरी पुष्प मेला हुने पक्का भएको छ । कात्तिक १५ देखि १८ गतेसम्म आयोजना हुने सो प्रदर्शनी पुष्प व्यवसाय प्रवद्र्धन गर्ने र व्यवसायीबीच प्रतिस्पर्धात्मक भावनाको विकास गरी गुणस्तरीय उत्पादनमा टेवा पुर्याउने रहेको छ ।
‘रोपेर फूल गोदावरी, सजाऔँ घर आँगन वरिपरि’ भन्ने अभियानसाथ हुने प्रदर्शनीमा व्यावसायिक ४४, सूचनामूलक तीन र गोदावरी फूलको प्रतिस्पर्धात्मक प्रदर्शनी ९ सहित ५६ कक्ष रहने फ्लोरिकल्चर एशोसिएशन नेपाल (फ्यान) ले जानकारी गराएको छ । नजीक आइरहेको तिहार तथा छठलाई लक्ष्य गरी आयोजना हुन लागेको सो प्रतिस्पर्धात्मक प्रदर्शनीमा ४५ प्रजातिका फूल तथा विरुवाको प्रदर्शनीसहित बिक्री वितरण गरिने फ्यानका अध्यक्ष कुमार कसजुले काठमाडौँमा आयोजित पत्रकार सम्मेलनमा जानकारी गराए ।
प्रदेश सरकार प्रदेश नं. ३, भूमि व्यवस्था, कृषि तथा सहकारी मन्त्रालय र पुष्प विकास केन्द्रको सहयोगमा हुने उक्त मेलाअन्र्तगतको प्रतिस्पर्धामा गोदावरी फूलका विभिन्न प्रकारमध्ये मुख्यतः स्पाइडर, मिनियचर, इन्क्रर्भ, रिफ्लेक्स तथा कट फ्लावर विधालाई समावेश गरिने जानकारी गराइएको छ । मेलामा रु ६० लाखको कारोबार हुने अनुमान गरिएको छ ।
नेपालमा पर्याप्त मात्रमा फूल उत्पादन गर्न नसक्दा गत बर्ष तिहारमा झण्डै तीन लाख माला भारतबाट आयात भएको थियो । नेपालमा फूल खेती व्यावसायिक ढङ्गले शुरुआत भएको २५ वर्ष पुगिसकेको छ । विसं २०११ देखि नेपाल प्राइभेट नर्सरीको स्थापनासँगै सामान्यस्तरमा शुरु भएको फूल व्यवसाय आर्थिक वर्ष २०७४÷०७५ सम्म आइपुग्दा ४३ जिल्लामा विस्तार भएको छ ।
नेपालमा करीब ७०० व्यक्ति र संस्थाले फूल व्यवसाय गरेका छन् । करीब दुई हजार ९६० रोपनीमा लगाइएको फूल खेतीबाट ४२ हजारभन्दा बढी व्यक्ति प्रत्यक्ष तथा अप्रत्यक्ष रुपमा लाभान्वित भएका छन् ।
