काठमाडौँ, कात्तिक १४ । विदेशी नागरिकले नेपालको बाघ बचाऊ अभियानमा सक्रियता देखाएका छन् ।
नेपालको हिमालय र तराई क्षेत्रमा रहेका प्राकृतिक सौन्दर्यलाई थप आकर्षण दिने जंगली जीवजन्तु बाघ,चितुवा र सिंह वातावरण प्रदुषण र मानवीय अतिक्रमणले जोखिममा पर्दै गएको भन्दै दक्षिण अफ्रिकाका गेसथ जेम्स लेगको नेतृत्वको टोलीले विश्वको सर्वौच्च शिखर सगरमाथाको आधार शिविरसम्म पुगेर ती जीवजन्तुको संरक्षणका लागि जनचेतना अभिबृद्धि गर्ने बुधबार आयोजित पत्रकार सम्मेलनमा जनाइयो ।
नेपालबाट थालिएको बाघ बचाऊ अभियानलाई विश्वभर लैजाने र विशेष गरी सञ्चार माध्यमबाट यस विषयमा सचेतना जगाउने जेम्सको भनाइ छ ।
नेपाल विश्वकै एक उत्कृष्ट पर्यटकीय गन्तव्यस्थल रहेको भन्दै उनले यी जीवजन्तु पर्यटकका लागि थप आकर्षण भएकाले यिनीहरुको लोप हुन दिनु नहुनेमा जोड दिए । सो टोलीले बिहीबारदेखि करिब दुई सातासम्म नेपालका विभिन्न स्थानमा जंगली जीवजन्तुको संरक्षणका गतिविधि गर्ने जनाएको छ ।
कार्यक्रममा मकालु एडभेन्चर्सका निर्देशक मोहन लम्सालले नेपालको बाघ संरक्षणका लागि निजीक्षेत्रबाट पहिलो पटक प्रयास थालिएको र यसबाट नेपालको पर्यटन प्रवद्र्धनका लागि ठुलो मद्दत पुग्ने विश्वास लिएका छन् ।
सो टोलीले नुवाकोटको तारुकामा शिक्षा, स्वास्थ्य, खानेपानीको भौतिक पूर्वाधार विकास र वातावरण संरक्षणका लागिसमेत सहयोग गर्दै आएको जनाइयो ।
