बलेवा, कात्तिक २६ । एक युवाको नेतृत्वमा सङ्कलन भएको रकमबाट सामुदायिक भवन निर्माण गरिएको छ ।
जिल्लाको काठेखोला गाउँपालिका–८ का ती युवाबाट संकलन गरिएर निर्माण गरिएको उक्त भवनका लागि लेखानीका लालबहादुर रोकाले हजुरबुबा भीमबहादुरको स्मृतिमा रु १२ लाख ४० हजार लगानी गरेपछि लेखानी युके समाजबाट रु १२ लाख, सिङ्गापुरमा बसोबास गर्दै आएका नेपालबाट रु ८७ हजार र स्थानीय संघसंस्थाबाट रु १२ लाख सङ्कलन भएको थियो ।
भवन निर्माणका लागि स्थानीयवासीले रु ८१ हजार बराबरको श्रमदान गरेका वडाध्यक्ष चित्रकला छन्त्यालले बताए । सो भवन व्यक्तिगत रुपमा धेरै रकम सहयोग गर्ने लालबहादुरका हजुरबुबाकै नामबाट नामाकरण गरी ‘भीमबहादुर रोका स्मृति भवन’ राखिएको छ ।
उक्त भवन गाउँमा आवश्यक पर्ने सबै खाले सामाजिक कामका लागि उपयोग हुने गरी निर्माण गरिएको हो । सो भवनको उद्घाटन गण्डकी प्रदेशका कांग्रेसका प्रमुख सचेतक मणिभद्र शर्मा कँडेलले गरेका थिए ।
भवन निर्माणका लागि यहाँ दलित समुदायले पनि श्रमदान र नगद सहयोग गरेका थिए । भवन बनेपछि वडास्तरका सामाजिक कार्यक्रम, आमा समूह, नागरिक सचेतना केन्द्र, वडा नागरिक मञ्चका कार्यक्रम सञ्चालन गर्नका लागि सजिलो भएको छ ।
यसका साथै सो गाउँपालिकाले भूमेचउरमा भ्यूटावरसमेत निर्माण गरेको छ । यो टावरबाट लेखानीसहित बिहुँ, रेश र अन्य गाउँको दृश्य हेर्न सकिन्छ ।
