काठमाडौँ, मङ्सिर ९ । आगामी माघ १ देखि महाकाली स्पोर्टस सोसाइटी र नेपालय इण्टरनेशनल इभेन्ट म्यानेजमेन्टको संयुक्त आयोजनामा प्राइम टाइम्स टी–ट्वान्टी त्रिकोणात्मक क्रिकेट प्रतियोगिता हुने भएको छ ।
माघ १० गतेसम्म सञ्चालन हुने सो प्रतियोगितामा नेपाल, भारत र श्रीलङ्काका क्लब गरी तीन टोलीको सहभागिता रहने महाकाली स्पोर्टस सोसाइटीका अध्यक्ष सुमन भट्टले आज आयोजित पत्रकार सम्मेलनमा जनाएका छन् ।
सो प्रतियोगितामा नेपालबाट महाकाली स्पोर्टस क्लब, श्रीलङ्काको कन्दुकार र भारतको सिडब्लुटी क्लबले भाग लिने उनले बताएका छन् । करीब रु ८० लाखसम्म खर्च लाग्ने सो प्रतियोगिताको पुरस्कार कति दिने भन्ने विषयमा छलफल हुन बाँकी रहेको आयोजकले जानकारी गराएको छ ।
नेपाली टोलीको छनोमा उत्कृष्ट ४० खेलाडीलाई क्याम्पमा राखेर चयन गरिने आयोजकले जानकारी गराएको छ । जसमा १४ खेलाडीसहित चार वैकल्पिक खेलाडी चयन गरिनेछ ।
उक्त प्रतियोगिता कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा हुनेछ ।
