काठमाडौँ, मङ्सिर १० । पेट्रोलियम पदार्थमा ठगी गर्ने १२ वटा पेट्रोलपम्पलाई नेपाल गुणस्तर तथा नापतौल विभागले कारवाही गरेको छ ।
विभागले पछिल्लो एक महीनाको अवधिमा सफ्टवेयर प्रविधिको प्रयोग गरी दुईदेखि पाँच प्रतिशतसम्म पेट्रोलियम पदार्थमा ठगी गर्ने पेट्रोलपम्पलाई कारवाही गरेको हो ।
कारवाही पर्नेमा विजय आयल स्टोर कलैया बारा, न्यू बंगलामुखी आयल स्टोर स्वयम्भू काठमाडौँ, हरिओम आयल स्टोर बारा, ममता आयल स्टोर कलैया बारा, स्वस्थानी आयल स्टोर बरीयापुर बारा, अमित आयल स्टोर बारा, खुश्बु फ्यूल सप्लायर्स ओखलढुङ्गा, शङ्कर पेट्रोलियम रुपन्देही, रिया आयल सप्लायर्स कपिलवस्तु, शङ्कर आयल स्टोर बारा, जयविकास आयल स्टोर बारा, लुम्बिनी लोटर्स आयल स्टोर रुपन्देही रहेका छन् ।
सफ्टवेयर प्रविधिको माध्यमबाट व्यापक मात्रामा उपभोक्ता ठगी गर्ने पेट्रोलपम्पलाई कारवाही गरिएको विभागका महानिर्देशक विश्वबाबु पुडासैनीले बताएका छन् ।
कारवाही गरिएका पेट्रोलपम्पलाई नगद रु ३० हजार, तीन वर्ष कैद र पेट्रोल पम्प शिलबन्दी गरेको उनले जनाएका छन् ।
