चितवन, मंसिर १० । कांग्रेस कमजोर हुँदा लोकतन्त्र पनि कमजोर हुने नेपाली कांग्रेसका नेता गगनकुमार थापाले बताएका छन् ।
आज नेपाल महिला संघ चितवन शाखाद्वारा आयोजित नेपाल प्रेस युनियन चितवन शाखाका नवनिर्वाचित कार्यसमितिलाई बधाई तथा शुभकामना दिने कार्यक्रममा बोल्दै उनले कांग्रेस बलियो बनाउनका लागि सबै एकजुट भएर लाग्नुपर्ने बताए ।
चुनावमा हार्दैमा निराश हुनु नपर्ने भन्दै नेता थापाले सङ्गठन विस्तारमा लाग्नुपर्नेमा जोड दिएका छन् । कांग्रेस कमजोर हुँदा सिङ्गो राष्ट्रले मूल्य चुकाउनुपर्ने उनको तर्क छ ।
उनले कांग्रेसले प्रतिपक्षमा रहेर संविधान कार्यान्वयन गर्दै समृद्धितर्फ मुलुकलाई अगाडि बढाउने कुरामा ध्यान दिनुपर्ने बताए । संघीयता चलाउन सुझबुझ चाहिन्छ, संघीयता नचले संविधान पनि सँगै जान्छ उनले भने ।
कार्यक्रममा नेपाली कांग्रेस चितवनका सभापति जीतनारायण श्रेष्ठ, महिला संघ चितवनका अध्यक्ष पार्वती शाह लगायतले आफ्नो विचार व्यक्त गरेका थिए ।
उक्त अवसरमा नेपाल प्रेस युनियनको नवनिर्वाचित कार्यसमितिका पदाधिकारी, सदस्य एवं पार्षद्हरुलाई सम्मान गरिएको थियो ।
