काठमाडौँ, मंसिर ११ । नेपालको संविधानसँग बाँझिएका कानून तत्कालन संशोधन गर्नका लागि सभामुख कृष्णबहादुर महराले सरकारलाई अनुरोध गरेका छन् ।
आज राष्ट्रियसभा विधायन व्यवस्थापन समितिले आयोजना गरेको ‘ऐन कार्यान्वयनमापन तथा अध्ययन अनुसन्धान सम्बन्धी एकदिने गोष्ठी’ को उद्घाटन कार्यक्रमा बोल्दै उनले संविधानसँग बाँझिएका २०० कानून भएको हुँदा तत्काल संशोधन गर्न सरकारलाई अनुरोध गरेका हुन् ।
संविधानसँग बाँझिएका कानून एक वर्षभित्र संशोधन गर्नुपर्ने व्यवस्था छ उनले भने– २०० कानून संविधानसँग बाँझिएका छन्, छिटोभन्दा छिटो संसद्मा आओस् ।
राष्ट्रियसभाका अध्यक्ष गणेश तिमिल्सनाले नयाँ संविधान अनुसार बनेका नयाँ १२४ र पुराना ३३९ कानून नयाँ संविधान अनुसार संशोधन गर्नुपर्ने आवश्यकता औंल्याए । आम नागरिकलाई सम्बोधन गरेर बनाइएका कानून प्रभावकारी भए÷नभएको अध्ययन गर्नुपर्नेमा उनको जोड छ ।
कानून, न्याय तथा संसदीय मामिलामन्त्री भानुभक्त ढकालले समय अनुसार कानून बनाउनुपर्ने भन्दै कानून लागू गर्न र अप्ठ्यारो परेर दबाब आएमात्रै कानून संशोधन गर्ने चलन सही नभएको बताए ।
उनले निर्माण भएका कानून सही रुपमा कार्यान्वयनमा आएको वा नआएको वा समय अनुकूल कानून परिमार्जन गर्नुपर्ने कुरामा सधँै ध्यान दिनुपर्नेमा जोड दिए ।
महान्यायाधिवक्ता अग्निप्रसाद खरेलले एउटा कानून १८–२० चरण प्रक्रिया पार गरेर बनाउनुपर्ने भएको हुँदा कानून बनाउनु पूर्व नै समाजमा त्यो कानून उपयुक्त वा समायाकूल हुने वा नहुने कुरामा अध्ययन गर्न जरुरी रहेको बताए ।
